ain.az bildirir, Azertag portalına istinadən.
Kiyev, 18 avqust, AZƏRTAC
Odessada Azərbaycan şirkətinə məxsus enerji obyektinə Rusiya tərəfindən qəsdən zərbə endirilib. Bu, bizim münasibətlərimizə və enerji müstəqilliyimizə vurulan zərbədir.
AZƏRTAC xəbər verir ki, bu barədə Ukrayna Prezidenti Volodimir Zelenski “Telegram” səhifəsində bildirib.
O qeyd edib: “Bu, Rusiyanın tamamilə nümayişkaranə və sinik zərbəsi idi. Onlar bilirlər ki, bu gün Vaşinqtonda müharibəyə son qoymaq üçün görüş olacaq. Biz Prezident Trampla əsas məsələləri danışacağıq. Söhbətdə Ukrayna ilə birlikdə Britaniya, Fransa, Almaniya, İtaliya, Finlandiya, Aİ və NATO liderləri iştirak edəcəklər.
Hər kəs layiqli sülh və həqiqi təhlükəsizlik istəyir. Məhz bu dəqiqələrdə ruslar Xarkovu, Zaporojyeni, Sumı vilayətini, Odessanı, yaşayış binalarını, mülki infrastrukturu vururlar.
Bunlar rusların qəsdən törətdiyi qətllər, uşaqların öldürülməsidir. Hazırda Xarkova pilotsuz uçuş aparatları ilə zərbələr endirilməsi nəticəsində yeddi nəfərin öldüyü, onların ən kiçiyinin bir yaş yarımlıq qız olduğu, onlarla insanın, o cümlədən uşaqların yaralandığı bilinir.
Zaporojye şəhərinə endirilən raket zərbələri nəticəsində 20 nəfər yaralanıb, 3 nəfər ölüb. Həlak olanların ailələrinə və yaxınlarına başsağlığı verirəm”.
Zelenski qeyd edib ki, Rusiya hərbi maşını hər şeyə rəğmən insanları qətlə yetirməkdə davam edir: “Putin Ukraynaya, Avropaya təzyiq göstərmək və diplomatik səyləri ələ salmaq üçün nümayişkaranə şəkildə öldürəcək. Ona görə də biz qətllərin dayandırılması üçün kömək gözləyirik. Məhz bu səbəbdən etibarlı təhlükəsizlik zəmanətlərinə ehtiyac var. Məhz buna görə Rusiya bu müharibədən ötrü heç bir güzəşt almamalıdır. Müharibəyə son qoyulmalıdır. “Dayan” sözünü məhz Moskva eşitməlidir”, –deyə Volodimir Zelenski vurğulayıb.
Emil Hüseynli
AZƏRTAC-ın xüsusi müxbiri
Kiyev
Hadisənin gedişatını izləmək üçün ain.az saytında ən son yeniliklərə baxın.
