Çinli YouTuber Sinq pişikləri üçün metro sistemi quraraq sosial şəbəkələrdə gündəm olub.
“İki sahil” xəbər verir ki, onun hazırladığı miniatür tunellər və stansiyalarla tam təchiz olunmuş layihə izləyicilərdən böyük maraq görüb və yalnız bir paylaşımda demək olar ki, bir milyon baxış toplayıb.
Sinq bildirib ki, layihəni dörd aya başa çatdırıb. O, iki il əvvəl inşa etdiyi pişik evi ilə bağlı paylaşımından sonra izləyicilərin xahişini nəzərə alaraq metro layihəsinə başlayıb. Ən böyük çətinliyi qatardan və perrondan eyni anda qapıların açılması, həmçinin işlək miniatür eskalator düzəltmək olub. Bir müddət düşündükdən sonra işi sadəcə başlamağa qərar verib və nəticədə real metroya bənzər qurğu ortaya çıxıb. Hətta sərnişinlər üçün qarşılama mesajı da əlavə edilib.
Bu metro sistemi Sinqin pişik evi layihəsinin davamıdır. O, əvvəllər də pişikləri üçün "Cybertruck", spa, dördtəkərli "Cyberquad", supermarket, qaraj və teatr inşa edib. Hətta bir dəfə bölgəsindəki sahibsiz pişiklər üçün cəmi 48 saatda 100 izolyasiyalı sığınacaq düzəltmişdi.
