Dünyada sağ olan ən yaşlı insan hesab edilən britaniyalı Etel Katerhem 116 yaşını qeyd edir.
KONKRET.az Oxu.Az-a istinadən xəbər verir ki, bu barədə “Sky News” nəşri məlumat verib.
Məlumata görə, London yaxınlığındakı Surrey qraflığında qocalar evində yaşayan Katerhem hazırda mətbuata danışmaqdan imtina edir. Lakin onun ailəsi yaydığı bəyanatda qadının doğum gününü sevdikləri ilə birlikdə keçirmək istədiyini və “bayramdan öz ritmində həzz almaq” niyyətində olduğunu bildirib.
Etel Katerhem 21 avqust 1909-cu ildə Hempşir qraflığında anadan olub. Dünyanın ən yaşlı insanı titulunu o, aprelin 30-da 116 yaş 326 günlük yaşında vəfat edən braziliyalı rahibə İna Kanabarro Lukasdan miras alıb.
Etel 18 yaşında Hindistana köçüb, orada dayə işləyib, daha sonra hərbçi olan əri birlikdə onun xidmət etdiyi Honkonqda və Cəbəllüttariqdə yaşayıb. Qadın hələ Asiyada olarkən uşaqları sevib və öz uşaq bağçasını açıb. İngiltərəyə qayıtdıqdan sonra onun iki qızı dünyaya gəlib.
Etel Katerhem təkcə 1976-cı ildə vəfat edən əri Normandan deyil, həm də müvafiq olaraq 2000-ci və 2020-ci illərdə vəfat edən qızları Cem və Enndən çox yaşayıb. Britaniyalı qadını həm də koronavirus infeksiyasından sağ çıxan dünyanın ən yaşlı insanlarından biri də adlandırmaq olar. O, 2020-ci ildə 110 yaşında COVID-ə qalib gəlib.
May ayında Katerhem deyib ki, onun uzunömürlülüyünün sirri hər yeni fürsətə “hə” deməsidir, çünki bunun hara aparacağını bilmirsən.
“Əşyalara müsbət yanaşın və hər şeyi sınayın, amma ölçülü şəkildə”, – deyə qadın məsləhət görüb.
Ginnesin Rekordlar Kitabının rəsmi məlumatlarına görə, uzunömürlülük üzrə mütləq rekord fransalı qadın Jann Kalmana məxsus olub. 1997-ci ilin avqustunda vəfat edəndə o, 122 yaş 164 günlük olub.
