Roma Papası Türkiyəyə səfər edəcək

  Roma Papası XIV Leo-nun Livana planlaşdırılan apostol səfəri Türkiyəyə də səfərlə müşayiət olunacaq.

Referans xəbər verir ki, bu barədə Vatikanın məlumatlı mənbəsi TASS-a açıqlamasında bildirib.

Pontifikin hər iki ölkəyə səfəri noyabr ayının sonuna nəzərdə tutulur.

“Papa atam Livana və Türkiyəyə gedəcək”, - deyə Vatikan mənbəsi səfərin təsdiqləndiyini qeyd edib.

Bundan əvvəl Antakya və Bütün Şərq Maronit Patriarxının vikarı, arxiyepiskop Paul Nabil əl-Sayyah pontifikin Livana səfərinin mümkünlüyü barədə açıqlama vermişdi. Maronit Kilsəsinin rəhbəri Patriarx Beçara Butros əl-Rai isə "Əl Ərəbiyyə" telekanalına müsahibəsində Papanın səfərinin noyabrın sonunadək baş tuta biləcəyini bildirmişdi.

Türkiyə tərəfi isə səfərin 30 noyabrda - Müqəddəs Endryu Günündə baş tutacağını təsdiqləyib.

Qeyd edək ki, XIV Leo-nun sələfi bu ilin aprelində vəfat etmiş Papa Fransisk, Nikeyada (müasir İznik) Birinci Ekumenik Şuranın 1700 illiyi münasibətilə Türkiyəyə səfər etməyi planlaşdırırdı. Lakin səhhətindəki problemlər səbəbindən bu səfər reallaşmamışdı./teleqraf