Belarus prezidenti Aleksandr Lukaşenko avqustun 21-də raket istehsalı məsələsinə həsr olunmuş müşavirə keçirib.
Bu barədə “Poliqon” Belarus prezidentinin rəsmi saytına istinadən xəbər verib.
Belarus prezidenti hərbi təhdidlərin səviyyəsindəki dinamikanı və ölkənin Qərb qonşuları tərəfindən hərbi xərclərin əhəmiyyətli dərəcədə artırılmasına diqqət çəkib. Onun sözlərinə görə, bu vəziyyət Belarusun müdafiə qabiliyyətinə daima ciddi diqqət ayırmasını zəruri edir. Məsələn, bu ilin iyun ayında Belarus dövlət başçısı döyüş meydanında getdikcə daha çox üstünlük qazanan pilotsuz aviasiya komplekslərinin inkişafı ilə bağlı bir sıra qərarlar qəbul edib.
A.Lukaşenko müşavirə zamanı Belarusda raket istehsalının inkişafı üzrə atılacaq növbəti addımlar barədə məlumat verib. O bildirib ki, bu mövzunu Rusiya Prezidenti Vladimir Putinlə müzakirə etməyi planlaşdırır.
“Mən Rusiya prezidenti ilə məsləhətləşəcəyəm ki, birgə necə hərəkət edəcəyik, təkliflərimiz və raket istehsalının modernləşdirilməsi və yaradılması ilə bağlı növbəti addımlarımız Rusiya Federasiyası üçün maraqlı olacaqmı?
Eyni zamanda, ölkənin bu mürəkkəb sahədəki nisbətən az təcrübəsi nəzərə alınmalıdır. Pilotsuz aviasiya kimi, sahə hərbi-sənaye kompleksimiz üçün nisbətən gəncdir və sıfırdan yaradılıb. Nail olduğumuz şeylər var, amma uğursuzluqlar da oldu, hələ də alınmayan məsələlər var. İqtisadiyyatın digər sektorlarında olduğu kimi, burada da mövcud maliyyə resurslarından maksimum səmərəli istifadə edərək fəaliyyət göstəririk. Bu, hər şeydən önəmlidir”, – deyə Belarus prezidenti vurğulayıb.
A.Lukaşenko qeyd edib ki, müasir döyüş əməliyyatlarının formaları və metodları nəzərə alınaraq bu istiqamətdə gələcək inkişafın istiqaməti və yolları müəyyənləşdirilməlidir.
