.webp)
Türkiyənin böyük elektronika və məişət texnikası istehsalçılarından biri olan Vestel, 2025-ci ilin ikinci rübü üzrə maliyyə nəticələrini açıqlayıb. Şirkət, ilin ilk 6 ayında rekord həcmdə zərər elan edib və minlərlə işçini ixtisar edib.
Milyardlarla lirəlik zərər
Marja xəbər verir ki, "Vestel Elektronik" bu ilin ilk yarısında 13,3 milyard Türkiyə Lirəsi (TL) xalis zərər açıqlayıb. Bu rəqəm şirkətin mövcud bazar dəyərinə (13,34 milyard TL) demək olar ki, bərabərdir. Ötən ilin eyni dövründə şirkətin zərəri 1,28 milyard TL idi.
Satışlar ilk 6 ayda 16% azalaraq 68 milyard TL-yə enib, Şirkətin törəməsi olan "Vestel Beyaz Eşya" da ilk yarımildə 2,87 milyard TL zərər açıqlayıb.
6 ayda 3 mindən çox ixtisar
Maliyyə vəziyyətinin pisləşməsi kadr siyasətinə də təsir edib. Son 6 ayda "Vestel Elektronik"də 2 min 561 nəfər, "Vestel Beyaz Eşya"da isə 854 nəfər olmaqla ümumilikdə 3 min 416 əməkdaşın işinə son verilib.
İstehsal və bazar performansında geriləmə
Şirkətin istehsal göstəriciləri də ciddi şəkildə azalıb. Vestel Elektronik-in istehsal həcmi ötən ilin eyni dövrü ilə müqayisədə 35% aşağı düşüb.
Maliyyə çətinlikləri şirkətin bazar performansına da təsir göstərib. Vestel-in səhmləri ilin əvvəlindən bəri 46% dəyər itirərək BIST-100 indeksində ən zəif nəticə göstərən kağızlar sırasında yer alıb.
