Milli.az portalından verilən məlumata əsasən, ain.az bildirir.
İrəvanda MiQ-29 qırıcısı dirəyə çırpıldı - "ən yavaş qəza" gündəm oldu.
Ermənistanın paytaxtı İrəvanda rus istehsalı MiQ-29 qırıcısı nəqliyyat zamanı qəza keçirib. Təyyarə şəhər küçələrində daşındığı anda dirəyə çırpılıb, daha sonra yol baryerinə dəyib. Yerli mediada hadisə "bəsit qəza" kimi xarakterizə edilib.
Hadisə bazar günü gecə saat 02:15-də baş verib. Təyyarənin gecə vaxtı diqqətdən kənar daşınacağı düşünülsə də, gözlənilmədən qəza ilə nəticələnib. Şəhər müşahidə kameralarının qeydə aldığı görüntülər qısa zamanda sosial şəbəkələrdə minlərlə dəfə paylaşılıb.
Yerli hakimiyyət orqanları əraziyə gələrək küçəni nəqliyyata bağlayıb və araşdırmalara başlayıb.
Ermənistan Müdafiə Nazirliyi məsələyə münasibət bildirməkdən imtina edib.
Qəza nəticəsində ölən və ya yaralanan olmayıb. Təyyarənin aldığı zərər barədə isə hələlik açıqlama verilməyib.
Hadisəyə səbəb olan qırıcı Erebuni aviabazasından daşınırdı. Baza Kollektiv Təhlükəsizlik Müqaviləsi Təşkilatı (KTMT) çərçivəsində Rusiyaya məxsus hərbi aviasiya məntəqəsi kimi fəaliyyət göstərir.
Qəzaya düşən MiQ-29-un 1989-cu ildə istehsal edildiyi, bort nömrəsinin isə "Red 15" olduğu bildirilib. Təyyarənin artıq uçuşlardan çıxarıldığı və istifadədən sonra daşındığı ehtimal edilir. MiQ-29A modelləri Rusiya Hava-Kosmik Qüvvələri tərəfindən mərhələli şəkildə xidmətdən çıxarılır və onların yerini MiQ-29SMT, Su-30SM və Su-35S kimi daha müasir qırıcılar tutur.
Lalə Qüdrətova
Milli.Az
Sonrakı hadisələr barədə daha çox məlumat almaq üçün ain.az saytını izləyin.
