Abbasəli Həsənov: “Rəsmi sənədlər sadəcə zahiri görüntüdür, əsas məqsəd silah və texnika danışıqlarıdır”
İran Prezidenti Məsud Pezeşkianın Belarusun paytaxtı Minskə səfəri regional və beynəlxalq səviyyədə ciddi diqqət doğurub. Səfər çərçivəsində İran və Belarus rəsmiləri arasında müxtəlif sahələri əhatə edən 12 əməkdaşlıq sənədi imzalanıb. Bu sənədlər siyasət, beynəlxalq hüquq, turizm, mədəniyyət, media, səhiyyə, əczaçılıq, sənaye, ətraf mühit və investisiya sahələrini əhatə edir. Prezident Pezeşkian həmçinin həmkarı Aleksandr Lukaşenko ilə keçirdiyi görüşdən sonra bəyan edib ki, İran və Belarus BRİKS, Şanxay Əməkdaşlıq Təşkilatı və Avrasiya İqtisadi İttifaqı çərçivəsində əməkdaşlığı daha da dərinləşdirə bilərlər.
Lakin məsələyə daha fərqli prizmadan yanaşan Azərbaycanın İrandakı sabiq səfiri Abbasəli Həsənov Moderator.az-a açıqlamasında bildirib ki, səfərin arxa planında daha ciddi məqsədlər dayanır:
“Məsud Pezeşkianın Belarus səfəri və Lukaşenko ilə görüşlərinin əsas mövzusu silah və hərbi texnika məsələləri olub. Yəni söhbət, İranın hazırda ehtiyac duyduğu və Belarusun təqdim edə biləcəyi avadanlıq və texnikaların təmin edilməsindən gedir”, – deyə sabiq səfir bildirib.
Diplomat qeyd edib ki, İran-Belarus münasibətləri yeni mərhələyə qədəm qoymayıb, əksinə, bu əlaqələr uzun illərdir ki, davam edir:
“Mənim İranda çalışdığım 1998–2009-cu illərdə də iki ölkə arasında həm iqtisadi, həm də hərbi sahədə sıx əməkdaşlıq vardı. Həmin ənənə bu gün də davam edir. Lakin fərq ondadır ki, İran indi artıq real müharibəyə hazırlaşdığı üçün Belarusla təmaslar əsasən hərbi xarakter daşıyır.”
Həsənovun sözlərinə görə, səfər zamanı imzalanan çoxsaylı sənədlər və açıqlamalar ictimaiyyətə təqdim olunan formal görüntüdən başqa bir şey deyil:
“Rəsmi razılaşmalar sadəcə diplomatik nümayişdir. Əsl məqsəd daha dərin və strateji məsələlərə – hərbi əməkdaşlığa yönəlib.”
Qeyd edək ki, Pezeşkianın bu səfəri prezident seçildikdən sonra regional siyasətdə atdığı əhəmiyyətli addımlardan biri kimi qiymətləndirilir və İranın yaxın aylarda daha aqressiv regional mövqeyə keçə biləcəyi ehtimal olunur.
Sultan Laçın
