Avropalı seçicilər Ukrayna ilə Rusiya arasında sülh sazişi əldə olunacağı təqdirdə, Ukraynaya sülhməramlı qüvvələrin göndərilməsi planına qarşı çıxırlar. Vətəninfo.az xəbər verir ki, bu barədə The Wall Street Journal məlumat yayıb.
Nəşrin yazdığına görə, bir çox avropalı seçici istənilən hərbi qüvvə yerləşdirilməsinə qarşı çıxır, çünki bu, onların təhlükəsizliyi üçün vacib olan resursların başqa yerə yönəldilməsinə səbəb ola bilər.
Ən güclü narahatlıqlar Şərqi Avropa ölkələrində müşahidə olunur. Həmin ölkələr öz sərhədlərinin qorunmasına daha çox önəm verirlər. İtaliya və Almaniyada isə İkinci Dünya müharibəsinin tarixi irsi səbəbilə bu məsələ daha həssas qəbul olunur.
Məsələn, Almaniyada ötən həftə Insa şirkəti tərəfindən keçirilən sorğunun nəticələrinə görə, respondentlərin 56%-i Almaniyanın bu prosesdə iştirakına qarşı çıxıb. Bu göstərici yaz ayları ilə müqayisədə artım nümayiş etdirib.
28 yaşlı almaniyalı Leonard Volters bildirib:
“Mən qorxuram ki, Bundsver (Almaniya ordusu) belə bir tapşırığın öhdəsindən gələ bilməz və bu, ölkənin müdafiəsini zəiflədə bilər.”
Fransada isə – sülhməramlı missiyanı dəstəkləyən əsas ölkələrdən biri – ictimai dəstək yalnız Ukrayna və Rusiya arasında tammiqyaslı sülh sazişi imzalanacağı halda mümkündür. Elabe şirkətinin mart ayında keçirdiyi sorğuya əsasən, fransızların 67%-i belə bir saziş imzalanarsa, Fransa qoşunlarının Ukraynaya göndərilməsini dəstəkləyir. Ancaq sadəcə atəşkəslə kifayətlənərsə, 68% respondent buna qarşı çıxır.
Paris sakini Nikola Degaş bildirib:
“Əgər biz Ukraynaya bərpa işləri üçün gediriksə, bu yaxşıdır. Amma əgər məqsəd qeyri-müəyyənlik yaratmaq və müharibəni davam etdirməkdirsə, bunun mənası yoxdur.”
Böyük Britaniyanın iştirakı da qeyri-müəyyən olaraq qalır. Sorğular göstərir ki, britaniyalılar öz hərbçilərinin sülh danışıqlarında iştirakını dəstəkləyirlər, lakin Rusiyayla birbaşa qarşıdurma istəmirlər.
Polşa da Ukraynaya hərbçi göndərilməsi məsələsində “qırmızı xətt”ini müəyyən edib. Rəsmi Varşava hesab edir ki, Polşa əsgərlərinin iştirakı münaqişənin daha da alovlanmasına və Polşa ərazisinə yayılmasına səbəb ola bilər.
United Surveys-in mart ayında keçirdiyi sorğuda iştirak edənlərin 58,5%-i Polşanın Ukraynaya qoşun göndərilməsinə qəti şəkildə qarşı çıxıb, 28%-i isə “yəqin ki, göndərilməməlidir” deyə cavab verib.
ABŞ dəstəyi olmadan Avropa ictimaiyyətini inandırmaq çətindir
Avropa rəsmiləri hesab edirlər ki, ABŞ-dan aydın dəstək açıqlaması olmadan ictimaiyyəti bu məsələyə inandırmaq çətin olacaq. Son həftələrdə diplomatik fəallıq artsa da, Vaşinqtonun Avropa qüvvələrinə dəstək verəcəyinə dair dəqiq siqnal yoxdur.
Buna baxmayaraq, bir çox Avropa liderləri Ukraynada hərbi qüvvələrin yerləşdirilməsini Avropanın təhlükəsizliyi üçün həyati əhəmiyyətli hesab edir. Onlar xəbərdarlıq edirlər ki, əgər Kiyev düşərsə, Rusiya digər Avropa regionlarına da hücuma keçə bilər.
Sülhməramlıların yerləşdirilməsi həm də Avropanın Ukraynanın müdafiəsinə sadiqliyini göstərir – ABŞ hələ hansı təhlükəsizlik zəmanətlərini verəcəyini düşündüyü halda.
Bu arqumentlər Niderland, Danimarka və Estoniya kimi Şimali Avropa ölkələrində daha çox dəstək tapır.
Tramp: ABŞ qoşun göndərməyəcək
Qeyd edək ki, ABŞ prezidenti Donald Tramp daha əvvəl bəyan etmişdi ki, sülh sazişi əldə olunsa belə, ABŞ Ukraynaya hərbi qüvvə göndərməyəcək. O, yalnız hava dəstəyi verə biləcəklərini bildirib.
Bununla yanaşı, Ukrayna Silahlı Qüvvələrinin zabiti Aleksandr Matyaş da hesab edir ki, nə ABŞ, nə də Avropa ölkələri Rusiyayla birbaşa qarşıdurma ehtimalı səbəbilə Ukraynaya qoşun göndərməyəcək.
