“Çelsi”nin hücumameyilli yarımmüdafiəçisi Karni Çukvuemeka London klubunu birdəfəlik tərk edərək Dortmund “Borussiya”sına keçib.
Arena.az bu barədə Almaniya klubunun rəsmi saytına istinadən xəbər verir.
Belə ki, “Borussiya” 2025-ci ilin əvvəlində 2,4 milyon avroya icarəyə götürdüyü yarımmüdafiəçinin transfer hüquqlarını da alıb. Bundesliqa təmsilçisi bunun üçün “Çelsi”yə daha 20 milyon avro ödəyib. 21 yaşlı futbolçu ilə 5 illik (2030-cu ilin 30 iyununadək) müqavilə imzalanıb.
Xatırladaq ki, Çukvuemeka “Borussiya”da icarədə oynadığı müddət ərzində bütün yarışlarda 17 oyun keçirib, 1 qol vurub.
Karni Çukvuemeka “Aston Villa”nın yetirməsidir. “Çelsi” onu 2022-ci ilin avqustunda 18 milyon avro qarşılığında heyətinə qatmışdı. Əslən Nigeriyadan olan ingiltərəli futbolçu “zadəganlar”ın heyətində cəmi 32 oyuna çıxıb, 2 qol və 1 assistlə yadda qalıb.
İngiltərənin aşağı yaş qrupları üzrə yığmalarında da oynamış Çukvuemekaya əsas millidə ehtiyac duyulmayıb.
“Transfermarkt” internet-portalı 21 yaşlı müdafiəçinin transfer dəyərini 18 milyon avro məbləğində qiymətləndirir.
