Polşada ABŞ Hərbi Hava Qüvvələrinə məxsus F-16 qırıcısı qəzaya uğrayıb. AzPost xəbər verir ki, insident Radom şəhərində keçiriləcək aviaşouya hazırlıq zamanı baş verib.
Məlumata görə, təlim uçuşu zamanı pilot “ölü halqa” fiqurunu yerinə yetirərkən hündürlüyü düzgün hesablamayıb və təyyarə yerə çırpılıb. Hadisə nəticəsində qırıcının pilotu həlak olub.
Qəza aviaşou öncəsi məşq zamanı baş verdiyindən ərazidə tamaşaçılar olmayıb. Hadisə yerinə fövqəladə xidmət əməkdaşları cəlb olunub.
Polşa tərəfi və ABŞ Hərbi Hava Qüvvələri qəza ilə bağlı araşdırmaya başlayıb. Təhlükəsizlik məqsədilə yaxın günlərdə planlaşdırılan uçuş proqramında dəyişikliklər ola biləcəyi istisna edilmir.
Hadisənin dəqiq səbəbləri xüsusi komissiya tərəfindən araşdırılacaq. ABŞ hərbçiləri bildiriblər ki, ilkin ehtimallara görə pilot manevri yerinə yetirərkən təhlükəsizlik hündürlüyünü nəzərə almamışdır.
Aviaşou təşkilatçıları baş verən qəzanı “böyük faciə” adlandırıblar və mərhum pilotun ailəsinə başsağlığı veriblər.
