Bu barədə Bakupost.az-a sözügedən reysin sərnişinlərindən biri məlumat verib.
Onun sözlərinə görə, təyyarənin kapitanı sərnişinlərə yalnız ingiliscə müraciət edib və Azərbaycan dilindən istifadə etməyib. Bunun səbəbini stüarddan soruşduqda isə məlum olub ki, stüard da Azərbaycan dilini bilmir, hava gəmisinin kapitanı da azərbaycanlı deyil və AZAL onu işə alarkən Azərbaycan dili öhdəliyi qoymayıb.
Daha bir heyrətamiz münasibət isə təyyarədə sərnişinlərə yemək verilərkən yaşanıb. Stüard və stüardessalar yemək təkliflərini ingiliscə səsləndiriblər, ən yaxşı halda isə ruscadan istifadə ediblər. Yalnız gəmi uçuşa hazırlaşarkən təhlükəsizlik qaydası azərbaycanca izah edilib, o da lent yazısı olub.
Bu hal sərnişinlərin narazılığına səbəb olub.
Qeyd edək ki, Azərbaycan Hava Yolları dövlət şirkətidir, Azərbaycanın dövlət dili isə Azərbaycan dilidir. Dünyanın heç bir ölkəsində təmsil etdiyi dövlətin dilində sərnişinlərə müraciət etməyən hava yolu şirkəti yoxdur, yalnız AZAL-dan başqa. Bu, Azərbaycan dilinə, Azərbaycan xalqına təhqirdir.
AZAL-da çalışmaq üçün yüksək peşəkarlığı olan pilotlarımız da, xidmət etmək üçün bir neçə dil bilən gənclərimiz də var. Təəssüf ki, AZAL "köhnə ənənəsini" tərgidə bilmir, Cahangir Əsgərovun dövründən qalan azərbaycanlılara təhqir sayılan dil rüsvayçılığını davam etdirir, azərbaycanlı gənclər, peşəkarlar qala-qala hansı səbəbdənsə əcnəbiləri işə alır və onlara Azərbaycan dilini öyrənmək tələbi də qoymur.
