Alimlər Marsın içində qədim qaya parçaları aşkar ediblər
Ajans.az Science jurnalına istinadən xəbər verir ki, planetin mantiyasında 4,5 milyard il əvvələ aid nəhəng qaya parçaları bu günədək qorunub saxlanılıb. İngiltərənin Imperial College London universitetindən Dr. Constantinos Charalambousun rəhbərlik etdiyi qrup səkkiz güclü marszəlzələ və meteor zərbəsinin yaratdığı seysmik dalğaları təhlil edib. Nəticədə, mantiyada diametri 4 kilometrə qədər olan massiv qaya bloklarının mövcudluğu üzə çıxıb. Mütəxəssislərin sözlərinə görə, bu fraqmentlər Günəş sisteminin ilk mərhələlərində baş verən kosmik toqquşmaların izləridir. Həmin dövrdə Mars və digər daxili planetlər meteoritlərin güclü bombardmanına məruz qalıb, nəticədə maqma okeanları yaranıb. Soyuma prosesindən sonra müxtəlif tərkibli qaya parçaları mantiyada dərinliklərdə ilişib qalıb. Yer kürəsində belə qədim strukturlar plitə tektonikasının daimi fəaliyyəti nəticəsində çoxdan itib. Mars isə sabit qabığa malik olduğundan bu qədim izləri “zaman kapsulu” kimi saxlayıb. Tədqiqatçılar hesab edirlər ki, bu kəşf Marsın geoloji tarixi və təkamülünü öyrənmək üçün unikal imkan təqdim edir. Tapıntılar həmçinin Venera və Merkurinin daxili quruluşunu anlamaqda mühüm açar rol oynaya bilər.
