Bakı metrosunda yeni stansiyaların inşası məqsədilə mərhələli işlər davam etdirilir.
“APA-Economics” xəbər verir ki, bunu jurnalistlərə açıqlamasında “Bakı Metropoliteni” QSC sədrinin müşaviri Emil Əhmədov deyib.
O bildirib ki, artıq “Yüksel Proje” şirkəti ilə müqavilə imzalanıb:
“Bura iki istiqamət daxildir: biri - 10 stansiyadan 9-nun və tunellərin layihələndirilməsi, ikincisi, Yaşıl və Qırmızı xətlərin ayrılmasının layihələndirilməsi. Xətlərin ayrılması zamanı “İçərişəhər” stansiyasında keçid kamerası, dönmə tuneli və yeraltı avtomobil dayanacağının layihələndirilməsi də nəzərdə tutulub.
Hazırda layihələndirmə işləri sürətlə davam edir. Stansiyaların yerlərinin dəqiqləşdirilmsi və rəsmiləşdirilməsi istiqamətində tədbirlər görülür. Tunel traslarının hazırlanması da fəal olaraq aparılır. Metro inşaatının özəllikləri çoxdur. Sadəcə, inşaat deyil, infrastruktura daxil olan bütün məsələlər nəzərdə tutulmalı, Tikintinin Norma və Qaydalarının bütün müddəaları nəzərə alınmalıdır”.
O qeyd edib ki,xətlərin ayrılması istiqamətində isə işlərə isə “Dərnəgül” deposu ilə başlanılıb:
“Hazırda tunellərdə 1 km-dən artıq dəmir yollarının çəkilməsi prosesi sürətlə davam edir. Yollar dəmir-beton blok üzərində olacaq. Depo ərazisində qatarlara təmir, qulluq, baxış sahəsində də dəmir-beton işləri görülür. Birinci mərhələdə, 7 belə sahə tam hazır vəziyyətə gətiriləcək. Bununla yanaşı, qatarların depoya daxil olması və onlara xidmət göstərilməsi üçün lazım olan bütün infrastrukturla bağlı işlər də qaydasında davam edir.
Bu günlərdə “28 May” stansiyası yaxınlığında da qazma işlərinə başlanması barədə məlumat vermişdik. Yaxın günlərdə şaxtaların qazıntısı da başlanacaq. Burada 30 metr dərinliyə qədər şaxta qazılacaq. “Dərnəgül” deposunun birinci mərhələsi başa çatdıqdan sonra isə bu şaxtalardan, əvvəllər elan etdiyimiz, 200 metrədək tunel inşası da başlanacaq”.
E.Əhmədovun sözlərinə görə, xətlərin ayrılması təkcə bundan ibarət olamayacaq:
““28 May” stansiyasının platformasını “Cəfər Cabbarlı” stansiyası ilə birləşdirən piyada tuneli də inşa olunacaq. Burada da layihə işləri tamamlanıb və hazırlıq işlərinə başlanılıb. münasib dövrdə bu tikinti işinə də başlanılacaq.
Həmçinin, hazırda xətlərin ayrıldıqdan sonra dayanıqlı enerji təminatını verəcək iki elektrik yarımstansiyanın da layihələndirilməsi işləri davam etdirilir.
“İçərişəhər” stansiyasının arxasındakı dönmə kamerası ilə bağlı hazırda geoloji kəşfiyyat-axtarış işləri davam etdirilir. Layihələndirmə yekunlaşan kimi həm dönmə kamerası, həm tunel, həm də avtoparkinqlə bağlı məlumatlar təqdim olunacaq”.
