"Bakı Metropoliteni" QSC qatarlar arasında intervalın daha da azaldılması üzərində iş aparır.
“İki sahil” xəbər verir ki, bunu jurnalistlərə açıqlamasında qurumun sədrinin müşaviri Emil Əhmədov bildirib.
"Bu ilin may ayında sərnişinlər üçün mühüm əhəmiyyət kəsb edən tarixi addım atılıb. Qatar cütlərinin sayı 30-dan 32-yə çatdırılaraq, hərəkət intervalı 1 dəqiqə 52 saniyəyə endirilib. Hazırda mövcud texniki imkanlar təftiş olunur və intervalın daha da azaldılması üzərində iş aparılıb. Məqsəd yeni tədris mövsümündə ənənəvi sərnişin sıxlığının qarşısını almaq üçün müsbət texniki həllərin tətbiqidir", - deyə o qeyd edib.
Metro rəsmisinin sözlərinə görə, intervalın azaldılması yalnız sərnişinlərin ən sıx olduğu saatlarda tətbiq olunacaq:
"Monitorinqlər yekunlaşmaq üzrədir və nəticələr yeni mövsüm ərəfəsində elan ediləcək. Amma artıq deyə bilərik ki, əlavə 4 qatarın xəttə buraxılması nəticəsində 19 min əlavə sərnişin daşınması mümkün olacaq. Bu isə illik hesabla təxminən 5 milyon sərnişin artımına bərabərdir".
O, həmçinin qeyd edib ki, bu nəticəyə nail olmaq üçün bir sıra texniki yeniliklər tətbiq olunur: "Dispetçer idarəetməsində qrafiklərin hazırlanması ənənəvi mexaniki üsullardan rəqəmsal texnologiyalara keçirilib. Bütün yollarda qatarların hərəkətini tənzimləyən sistemlərin işi yenidən nəzərdən keçirilir, texniki və insan faktoru ilə bağlı dinamik həllər tətbiq edilir. Metro üçün hər saniyə xüsusi əhəmiyyət daşıyır. Qarşıdakı müddətdə yeni qrafik, interval fərqləri və digər texniki məsələlər ictimaiyyətə təqdim olunacaq".
