Fidan qeyd edib ki, Türkiyədə keçirilən danışıqların üçüncü raundunda ilk dəfə olaraq Ukrayna və Rusiyanın konkret mövqeləri təqdim olunub.
Modern.az-ın məlumatına görə, Türkiyənin xarici işlər naziri Hakan Fidan bu haqda TGRT Haber telekanalına müsahibəsində bildirib. O deyib ki, Rusiya Ukraynanın qismən işğal olunmuş dörd bölgəsinə artıq tam nəzarəti ələ keçirmək niyyətində deyil.
“Əvvəllər ruslar dörd bölgənin bütün inzibati sərhədlərini ələ keçirmək niyyətində idilər. İndi onlar bu tələblərdən əl çəkiblər”, – o deyib.
Fidan bildirib ki, Türkiyədə Ukrayna və Rusiya arasında keçirilən danışıqların üçüncü raundunda ilk dəfə olaraq hər iki tərəfin konkret mövqeləri təqdim olunub. Onun sözlərinə görə, məsələ daha sonra ABŞ prezidenti Donald Tramp və Rusiya lideri Vladimir Putin arasında Alyaskada keçirilən görüşdə müzakirə edilib.
Türkiyənin xarici işlər naziri qeyd edib ki, Rusiya indi bütün Donetsk bölgəsinə nəzarəti ələ keçirmək, eləcə də Zaporojye bölgəsində təmas xətti boyunca mövqelər tutmaq istəyir.
“Bu, dörd ilə yaxındır davam edən müharibə üçün əsas yaradır. Bunun hər iki ölkə, xüsusən də ukraynalılar üçün çətin qəbul edilən tərəfləri var”, – diplomat vurğulayıb.
Fidan həmçinin etiraf edib ki, Donetsk vilayəti itirilsə, Ukraynanın qalan əraziləri müdafiə etməsi daha çətin olacaq. Onun sözlərinə görə, beynəlxalq təhlükəsizlik təminatları vəziyyətin sabitləşməsinə və dialoqun inkişafına kömək edəcək.
Daha əvvəl “Politico” yazmışdı ki, avropalı diplomatlar və hərbi rəsmilər Ukrayna və Rusiya mövqeləri arasında 40 kilometrlik bufer zonanın yaradılmasını nəzərdən keçirirlər.
Rusiya 2024-cü ilin iyununda Ukraynaya qarşı irəli sürdüyü tələblərə əsasən, Kiyev işğal olunmuş dörd vilayətin hamısını – Donbası təşkil edən Ukraynanın şərqindəki Donetsk və Luqansk, eləcə də cənubdakı Xerson və Zaporojyeni Rusiya Federasiyasının tərkibinə verməli idi. Krımdan isə söhbət getmir.
