“Dərdini içində çəkir, ailəsi üçün darıxır. Ən başlıcası dörd divar arasında keçən illərinə heyfsilənir”.
Bunu Qaynarinfo-ya açıqlamasında meyxanaçı Samirə Yusifqızı hazırda həbsdə olan həmkarı Rəşad Dağlının yayılan görüntülərindən danışarkən deyib.
Meyxanaçı Rəşad Dağlının qısa zamanda saçının ağarmasını belə izah edib:
“Saç ağarıbsa, bu onun öz daxilində gedən mücadilədir. İstirahətdə, sanatoriyada deyil ki. Çox şükür, sağ-salamatdı”.
Samirə Yusifqızı həmkarına tezliklə azadlığa qovuşmağı arzulayıb:
“İnşallah bitəcək və tezliklə azadlıqda, balalarının başı üstündə olacaq”.
Qeyd edək ki, Rəşad Dağlı qonşusu – 1979-cu il təvəllüdlü İsgəndər Mehdiyevi avtomobilində bıçaqla qətlə yetirib. Hadisə 2022-ci il noyabrın 9-da baş verib. Rəşad Dağlıya qarşı Cinayət Məcəlləsinin 120.1 (qəsdən adam öldürmə) və 228.4-cü maddələri (qanunsuz soyuq silah gəzdirmə) ittiham irəli sürülüb, Bakı Ağır Cinayətlər Məhkəməsinin hakimi Leyla Əsgərova-Məmmədovanın hökmü ilə 9 il 6 ay müddətinə azadlıqdan məhrum edilib.
