Bakı, 29 avqust, AZƏRTAC
Aİ-nin xarici siyasət və təhlükəsizlik siyasəti üzrə ali nümayəndəsi Kaya Kallas cümə günü bildirib ki, Rusiyanın Kiyevə mülki vətəndaşların ölümünə və Aİ Nümayəndəliyinin binasına ziyan vurmasından sonra Ukraynanın təcili olaraq daha çox hərbi dəstəyə ehtiyacı var.
AZƏRTAC xarici mediaya istinadla xəbər verir ki, Aİ müdafiə nazirlərinin görüşündən əvvəl bəyantla çıxış edən Kallas Rusiyanın son hücum dalğasının Moskvanın sülh səylərinə məhəl qoymadığını göstərdiyini vurğulayıb. O deyib: “Bu hücumlar göstərir ki, Putin hər cür sülh səylərini ələ salır. Beləliklə, əsas vəzifə Rusiyaya təzyiq göstərməkdir. Onların başa düşdüyü budur, təzyiq”.
Ali nümayəndə təsdiqləyib ki, nazirlər diqqəti hərbi yardımın sürətləndirilməsinə yönəldəcəklər. O əlavə edib: “Ukraynanın hazırda güclü hərbi dəstəyə ehtiyacı var və buna görə də biz məsələni müdafiə nazirləri ilə də müzakirə edirik. Sursatla bağlı təşəbbüsümüz var və biz bu ilin sonuna qədər vaxt təyin etmişik”
O, hər hansı bir sülh razılaşması əldə olunduqdan sonra da görüləcək tədbirlərə toxunub: “Avropa İttifaqı səviyyəsində bizim təhlükəsizlik zəmanətlərinə verdiyimiz töhfə təlim missiyası, hərbi missiya, həmçinin Ukraynanın müdafiə sənayesinə verəcəyimiz dəstəkdir. Biz bu gün hər hansı sülh sazişi bağlandıqdan sonra hazır olmaq üçün bütün bu missiyaların mandatını necə dəyişdirəcəyimizi müzakirə edirik. Bəzi üzv dövlətlər artıq öz qoşunlarını göndərmək istəyir. Bəziləri buna hazır deyil. Amma bu müzakirələr hələ də davam edir”.
Kallas bir daha vurğulayıb ki, yalnız təzyiq Moskvanı sülh sazişi bağlamağa məcbur edə bilər. O əlavə edib: “Rusiya sülh istəmir. Bu, hazırda etdikləri hücumlardan da çox aydındır. Ona görə də biz onlara təzyiq etməliyik ki, onlar da sülh istəsinlər. Onlara ən çox mənfi təsir edən enerji və maliyyə sanksiyalarıdır”.
Ali nümayəndə qeyd edib ki, nazirlər Ukrayna ilə yanaşı, İran da daxil olmaqla daha geniş təhlükəsizlik məsələlərini də müzakirə edəcəklər: “İrana gəldikdə, siz bilirsiniz ki, dünən “snapback” (beynəlxalq sanksiyaların bərpası mexanizmi) başladılıb. Beləliklə, biz bu 30 gündə yeni bir mərhələyə qədəm qoyuruq. İranla bağlı narahatlığımız onların nüvə proqramı, ballistik raketləri, həmçinin Rusiyaya dəstəyi ilə əlaqədardır”.
