Qaynarinfo saytına istinadən ain.az xəbər verir.
(Yazı "İctimai və dövlət maraqlarının müdafiəsi" mövzusu üzrə hazırlanıb.)
Hər bir ölkədə olduğu kimi, Azərbaycanda da dövlət maraqlarının müdafiəsi sözsüz ki, ən vacib və prioritet məsələlərdən biridir. Yəni ictimai və dövlət maraqlarının müdafiəsi vacib şərtdir. Cəmiyyət və xalq ilə dövlət arasında uçurum olduğu təqdirdə isə dövlətin inkişafı mümkünsüzdür.
Dövlətin sabitliyi və inkişafı
Hər bir dövlətdə olduğu kimi, Azərbaycanda da dövlət maraqlarının təmin olunması və inkişafında sabitlik, təhlükəsizliyin təmin olunması, dayanıqlı inkişaf amilləri mühüm yer tutur.
Eyni zamanda, müəyyən amillər də var ki, dövlət və milli maraqların müdafiəsinə bu və ya digər dərəcədə mane olur və yaxud olmağa çalışır. Dövlətin məqsədi həmin amilləri üzə çıxarıb, onları neytrallaşdırmaqdır.
Milli maraqların müdafiəsinin çətinlikləri
Mövzu ilə bağlı Qaynarinfo-ya açıqlamasında Konstitusiya Araşdırmalar Fondunun rəhbəri, hüquqşünas Əliməmməd Nuriyev bildirir ki, yerləşdiyimiz regionun böyük güclərin maraq dairəsində olması faktı istər-istəməz milli maraqların müdafiəsini çətinləşdirir:
"Azərbaycanın yerləşdiyi region geosiyasi baxımdan çox mürəkkəbdir. Burada böyük güclərin maraqları toqquşur. Bu isə öz növbəsində milli maraqların müdafiəsini çətinləşdirir. Xarici təhdidlər, informasiya müharibəsi, dezinformasiya kampaniyaları daima müşahidə olunur. Daxildə isə səmərəsizlik, siyasi bütləşmə kimi amillər də dövlətin maraqlarının müdafiəsini zəiflədə bilər".
Həmsöhbətimiz bildirir ki, hazırda Azərbaycanda yuxarıda qeyd edilən mənfi amillər artıq yoxdur:
"Amma bununla belə, idarəçiliyin təkmilləşdirilməsi, korrupsiyaya qarşı mübarizənin daha da gücləndirilməsi vacib məfhumlardan biridir. Ənənəvi yanaşmaya görə, milli maraqlar yalnız hərbi güclə qorunur. Halbuki iqtisadi, hüquqi, sosial və mədəni dəyərlər də bu məsələdə eyni dərəcədə önəmlidir".
Dövlət başçısının rolu və siyasətin ardıcıllığı
Ekspert qeyd edir ki, dövlət və milli maraqların qorunması istiqamətində dövlət başçısının rəhbərliyi altında ardıcıl və prinsipial siyasət həyata keçirilir:
"Bir tərəfdən güclü hüquqi baza və dövlət institutları möhkəmləndirilir. Digər tərəfdən isə şəffaflıq və hesabatlılıq artırılır. Ən vacib məqamlardan biri də odur ki, Prezidentin də vurğuladığı kimi, milli maraqlar heç vaxt güzəşt predmeti olmayacaq. Prezidentin bu qətiyyətli mövqeyi daha aydın şəkildə sonuncu dəfə "Əl-Ərəbiyyə” televiziya kanalına verdiyi müsahibəsində dünya ictimaiyyətinə təqdim olundu".
Milli maraqların müdafiəsinin nümunələri
Hüquqşünas deyir ki, Vətən müharibəsində qazandığımız qələbə, Qarabağ və Şərqi Zəngəzurun bərpası istiqamətində aparılan quruculuq işləri milli maraqlarımızın necə qətiyyətlə müdafiə edildiyinin bariz nümunəsidir:
"İnformasiya təhlükəsizliyi sahəsində konkret addımlar atılır. Dezinformasiyaya qarşı milli informasiya siyasəti qurulur. İqtisadi müstəqilliyin təmin olunması üçün diversifikasiya siyasəti həyata keçirilir. Xarici siyasətdə çoxşaxəli və balanslı yanaşma aparılır. Eyni zamanda, prinsipial mövqe Azərbaycanın milli maraqlarının müdafiəsində mühüm rol oynayır. Dövlətin milli maraqlarının qorunmasında həlledici amil Prezidentin liderliyi və dövlətlə xalqın birliyidir".
Rüfət Sultan
Material Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır.
Daha ətraflı məlumat və yeniliklər üçün ain.az saytını izləyin.
