"Prezident İlham Əliyevin “Əl-Ərəbiyyə” telekanalına verdiyi müsahibə Azərbaycanın inkişaf prioritetləri və ölkəmizin təşəbbüslərinin təqdimatı baxımından xüsusi önəm kəsb edir. Dövlətimizin başçısı konkret layihələr və gələcəyə dair strategiyaları ətraflı şərh edərək, regionda dayanıqlı və etibarlı əlaqələrin vacibliyini ön plana çıxarıb".
"Unikal" xəbər verir ki, bunu Milli Məclisin deputatı Asif Əsgərov deyib.
Deputat bildirib ki, 44 günlük Vətən müharibəsi Azərbaycan üçün tarixi əhəmiyyət kəsb edən bir dönəm idi: "Bu müharibə nəticəsində həm işğalda olan torpaqlarımız azad edilib, beynəlxalq hüququn prinsipləri bərpa olunub. Xalqımız üçün bu şanlı qələbə həm də milli qürur və birliyimizin bir təzahürüdür. Postmüharibə dövründə yaranan boşluq, vasitəçilərin hansı addımı atmalı olduqlarını bilməməsi fonunda Azərbaycanın təşəbbüsü ilə sülh prosesinə başlamağı zəruri edib. Dövlətimiz danışıqların təşəbbüskarı olaraq regionda dayanıqlı sülh üçün konkret addım atıb və sülh sazişinin layihəsini təqdim edib. 2025-ci il avqustun 8-də Vaşinqtonda paraflanmış sənəd Azərbaycan-Ermənistan münasibətlərinin dövlətlərarası çərçivədə necə qurulmalı olduğunu dəqiq şəkildə göstərir və ölkəmizin mövqeyini beynəlxalq ictimaiyyətə çatdırır.
Belə ki, danışıqlar prosesi illərlə davam edib, yalnız ABŞ Prezidenti Donald Trampın və onun komandasının dəstəyi ilə yekunlaşıb. Bu proses Azərbaycan və Ermənistan arasında uzun müddət davam edən qarşıdurmanı sona çatdırmaqla yanaşı, Cənubi Qafqaz, Mərkəzi Asiya və Yaxın Şərq üçün yeni geosiyasi imkanlar yaradıb. Sülh sazişinin hələ də imzalanmaması, Ermənistanın konstitusiyasında Azərbaycanın ərazi bütövlüyünü şübhə altına alan müddəanın mövcudluğu ilə izah olunur. Bu müddəa dəyişdirildikdən sonra sülh sazişi rəsmi olaraq imzalanacaq. Lakin fakt budur ki, Ağ Evdə Prezident Trampın iştirakı ilə paraflanmış sənəd artıq müharibənin sona çatdığını rəsmiləşdirməklə regionda yeni reallıqların formalaşdığını göstərir.
Vaşinqtonda imzalanan sənədin əsas əhəmiyyəti odur ki, hər iki tərəf bir-birinin ərazi bütövlüyünü tanıyır və gələcəkdəki münasibətlərini beynəlxalq hüququn fundamental prinsipləri əsasında planlaşdıracaq. Əgər Ermənistan dövlətimizin ərazi bütövlüyünü tanımaqdan imtina edərsə, Azərbaycan da qarşı tərəfin ərazi bütövlüyünü tanımaqdan imtina edəcək. Bu, ölkəmizin milli maraqlarını qoruyan və regionda davamlı sülhü təmin edən əsas prinsiplərdən biridir. Razılaşma yalnız iki dövlət arasında mövcuddur və regionda ədalətli və dayanıqlı münasibətlərin bərqərar olması üçün atılmış strateji addımdır.
Praqmatik xarici siyasət çərçivəsində Azərbaycan çətin vəziyyətdə olan dövlətlərlə dialoq qurur, həmçinin regionda və beynəlxalq səviyyədə nüfuzunu gücləndirir. Sülhə nail olmaq üçün ölkə zəngin təcrübəyə malikdir. İşğal altında qalmaq, müharibə şəraiti və qalib dövlət olmaq təcrübəsi, eləcə də sülh prosesində əldə olunan nəticələr Azərbaycanı hadisələrə çevik və effektiv şəkildə reaksiya verməyə hazırlayıb. Bu təcrübə həm də ölkəmizin milli maraqlarını qoruyarkən, regionda və dünyada etibarlı və nüfuzlu tərəfdaş kimi çıxış etməsinə imkan yaradır. Dövlətimizin başçısı müsahibəsində qeyd edib ki, bu gün az sayda ölkə hazırda çətin vəziyyətdə olanlarla çox səmimi şəkildə danışa bilər: “Biz bunu etməyə hazırıq. Ümidvarıq ki, bu işləyəcək. Lakin əlbəttə ki, biz heç kəsə özümüzü məcburi təqdim etmirik. Sadəcə, bizdən xahiş ediləndə zəruri olanı edirik”.
Enerji təhlükəsizliyi məsələsində Azərbaycan artıq Avropa ölkələrinin enerji təminatında mühüm rol oynayır. Hazırda 10 Avropa ölkəsi Azərbaycan qazı ilə təmin olunur və onlardan 8-i Avropa İttifaqının üzvüdür. Bu, ölkəmizin qlobal enerji təhlükəsizliyindəki strateji rolunu gücləndirir və gələcəkdə bu rolun daha da artacağına işarə edir. 2030-cu ilədək Azərbaycan əlavə 8 milyard kubmetr təbii qazı təmin edəcək, bu da enerji təhlükəsizliyi və regionun sabitliyi baxımından böyük əhəmiyyət daşıyır. Həmin resursların necə və hansı istiqamətdə istifadə olunması isə strateji əhəmiyyət kəsb edir və regionda etibarlı əməkdaşlığın təmin olunmasına töhfə verir.
Prezident İlham Əliyev müsahibəsində Azərbaycan üçün sülh, stabillik və enerji təminatı baxımından mühüm mesajlar verir. Ölkənin xarici siyasəti milli maraqlar üzərində qurulub, regionda və beynəlxalq səviyyədə dayanıqlı, konstruktiv və etibarlı tərəfdaş olduğunu sübut edir. Dövlətimizin təşəbbüsləri yalnız regional deyil, qlobal miqyasda da qəbul edilir və davamlı sülhün qorunması üçün aktiv addımlar atılır. Bu müsahibə, həmçinin ölkənin strateji düşüncəsini və gələcəyə yönəlmiş siyasətini beynəlxalq auditoriyaya ətraflı şəkildə çatdırır".
