Çin Xarici İşlər Nazirliyinin sözçüsü Qo Cyakun bildirib ki, Pekin bir sıra Avropa ölkələrinin BMT-nin İrana qarşı sanksiyalarının yenidən tətbiqi mexanizminin işə salınması istiqamətində hərəkətlərini qeyri-konstruktiv hesab edir. Bu barədə “Global Times” məlumat yayıb.
Çin hesab edir ki, BMT Təhlükəsizlik Şurasının hazırkı mərhələdə istənilən hərəkəti vəziyyəti pisləşdirə və ya gərginləşdirə biləcək yeni qarşıdurma yaratmaqdansa, dialoqun və danışıqların bərpasına töhfə verməlidir.
"Təhlükəsizlik Şurasında sanksiyaların bərpası mexanizminin işə salınması konstruktiv olmayacaq və İranın nüvə probleminin həlli ilə bağlı siyasi və diplomatik prosesə xələl gətirəcək", - Qo Cyakun vurğulayıb.
Avqustun 28-də Aİ-3 ölkələri - Böyük Britaniya, Almaniya və Fransa BMT Təhlükəsizlik Şurasına sanksiyaların bərpası mexanizminin işə salınması üçün sorğu göndərib. Qətnaməyə əsasən, Şura 30 gün ərzində bununla bağlı qərar qəbul etməlidir.
Rizvan CƏFƏROV,
“Azərbaycan”
