- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
50 yaşlı kişi həmkəndlisinə xəsarət yetirib
Demokrat.az-ın əldə etdiyi xəbərə görə, hadisə bu ilin martın 11-də rayonun Ağalıkənd kəndinin mərkəzində yerləşən çayxananın qarşısında baş verib.
Rayon sakini, 1975-ci il təvəllüdlü Nemət insanların çoxluq təşkil etdiyi yerdə, heç bir əsaslı səbəb olmadan Afiqi nalayiq sözlərlə söyüb, təhqir edib. Bir neçə dəfə sifət nahiyəsindən yumruq və şillə zərbələri ilə vurub.
Hadisəni törədən Nemətin barəsində Cinayət Məcəlləsinin 221.1-ci (xuliqanlıq, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, şəxslər üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər) maddəsi ilə ittiham elan edilib.
İş üzrə izahat verən təqsirləndirilən şəxs ona elan olunmuş ittiham üzrə özünü təqsirli bilməyib. O, ifadəsində göstərib ki, 3-cü qrup gözdən əlildir, zərərçəkmiş Afiqi tanıyır, münasibəltəri normal olub, hər hansı bir ədavəti və problemi olmayıb: “Martın 11-də, saat 20 radələrində Ağalıkənd kəndində mərkəzdə yerləşən çayxanaların birinə tanışım Şəmşir ilə birlikdə getdim. Həmin vaxt Afiqin orada oturaraq çay içməsini gördüm. Şəmşir ilə birlikdə çayxanada başqa stolda əyləşdik. Həmin zaman Afiq mənimlə danışdı, ona borcumun olmasını, Afiqdən gübrə aldığımı dedi. Mən isə Afiqə gübrəni ondan borca almağımı və öz ünvanına geri qaytardığımı dedim. Sonra isə yalan danışan şəxsin ünvanına söyüş söydüm. Afiqin üzərinə gələrək məni söydüyünə görə onun ağız nahiyəsini əlim ilə tutdum, özümdən uzaqlaşdırdım. Sonra isə yanımda olan Şəmşirin köməkliyi ilə oradan uzaqlaşaraq getdim”.
Bu cinayət işinə Biləsuvar Rayon Məhkəməsində baxılıb. Məhkəmənin hökmü ilə Afiqə 6 ay müddətinə azadlığın məhdudlaşdırılması növündə cəza təyin edilib.
Təqsirləndirilən şəxsin üzərinə cəzaçəkmə müddəti ərzində yaşayış yerini hər gün saat 22:00-dan növbəti gün saat 07:00-dək tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək tapşırılıb.
Bundan əlavə ona cəza çəkmə müddəti ərzində Biləsuvar rayonunun ərazi hüdudlarını tərk etməsi qadağan olunub. Müvafiq məhkəmə qərarı olmadan yaşayış yerini dəyişdirməmək, habelə cəzanın icrasına nəzarət edən orqanı iş yerinin dəyişdirilməsi barədə əvvəlcədən məlumatlandırmaq, kütləvi və digər tədbirlər təşkil etməmək və belə tədbirlərdə iştirak etməmək vəzifələri qoyulub.
Təqsirləndirilən şəxsin üzərinə qoyulmuş vəzifələri yerinə yetirməsinə nəzarətin həyata keçirilməsi yaşayış yeri üzrə İcra və Probasiya Şöbəsinə həvalə edilib.
Fariz Məlikli
Demokrat.az
