Türkiyənin Azərbaycandakı səfirliyində 30 avqust - Zəfər bayramı münasibətilə tədbir keçirilib.
News365.az xəbər verir ki, qəbulda Azərbaycan Ordusunun Baş Qərargah rəisi general-polkovnik Kərim Vəliyev, Azərbaycanda akkreditə olunmuş diplomatik korpus nümayəndələri, Azərbaycanın ictimai-siyasi xadimləri, media nümayəndələri iştirak edib. Tədbirin açılışında hər iki ölkənin dövlət himnləri səsləndirilib.
Daha sonra Türkiyənin Azərbaycandakı səfiri Birol Akgün Türkiyə Prezidenti Rəcəb Tayyib Ərdoğanın tədbirə göndərdiyi mesajı oxuyub.
Keçirilən tədbirə göndərdiyi mesajda Türkiyə Prezidenti Rəcəb Tayyib Ərdoğan qeyd edib ki, 30 Avqustda qazanılan böyük Zəfər qurtuluş yolumuzun mənzili olub: “Qazi Mustafa Kamal Atatürk 30 avqust Zəfər Bayramının əsas ünsürünün - millətimiz, millətimizin iradəsi və Qəhrəman Ordumuz olduğunu qeyd edib. 86 milyonun bütün fərdləri olaraq gələcəyin Türkiyəsini birlikdə inşa etməyə çalışırıq. Terrordan xilas oluruq. Digər tərəfdən bölgəmizdə sərhədlərin qanla yenidən çəkilməsi istənilən - Qəzza və Fələstində ən dəhşətli dövrdən keçirik. Türkiyə olaraq, hər zaman məzlumun yanında olacağıq”.
Səfir Birol Akgün də Azərbaycan-Ermənistan arasında davamlı sülhə doğru atılan addımlardan bəhs edib.
Tədbirdə iştirak edən Azərbaycan Ordusunun Baş Qərargah rəisi general-polkovnik Kərim Vəliyev Türk Silahlı Qüvvələrinin rəhbərliyində olan yeni təyinatlardan danışıb: “Əminəm ki, bu, hərbi sahədə əməkdaşlığımızın inkişafına növbəti təkan verəcək”.
Kərim Vəliyev daha sonra Türkiyə və Azərbaycanın hərbi sahədə əməkdaşlığı, son görülən işlər barədə məlumat verib.
