"Biz müharibə istəmirik, amma hücum olarsa, güclə müqavimət göstərəcəyik".
Turkustan.az xəbər verir ki, İran Prezidenti Məsud Pezeşkian İsrail və ABŞ-ın "İranı parçalamağı və məhv etməyi" hədəflədiklərini bildirərək deyib:
"Biz müharibə istəmirik, amma əgər müharibə istəsələr, biz müqavimət göstərəcək və onların qarşısında möhkəm dayanacağıq."
Pezeşkian bu fikirləri dövlət televiziyasında jurnalistlərin suallarını cavablandırarkən səsləndirib.
Avropa ölkələrinin İrana qarşı BMT sanksiyalarını bərpa etməyə imkan verən və “tətik” (snapback) mexanizmi kimi tanınan proseduru işə salmaq niyyəti ilə bağlı suala cavab verən Pezeşkian deyib:
“Biz bu mexanizmin işə düşməsini qətiyyən istəmirik. Amma bəzi Avropa ölkələrinin bir çox beynəlxalq qanunları pozmasına baxmayaraq, bu gün İrana qarşı nüvə razılaşmasını qəbul edə bilməmələri sual doğurur. Görəsən, bu ölkələrin belə bir iddiası mövcuddurmu?”
Prezident əsas narahatlığının xarici deyil, daxili münaqişələr olduğunu da vurğulayıb:
“Məni geri çəkilmək və ya xarici təhdidlər qorxutmur. Ən böyük narahatlığım daxili fikir ayrılıqları və bəzən kiçik məsələlərdən qaynaqlanan münaqişələrdir. Düşmənlər də məhz bu parçalanmaları səbirsizliklə gözləyir.”
Pezeşkian əlavə edib ki, “parlamentdən və dövlət televiziyasından gələn bəzi səslər də bu daxili parçalanmanı daha da alovlandırır.”
Sonda ABŞ və İsrailin İranla müharibə istədiyini vurğulayan Pezeşkian belə deyib:
“Biz müharibə istəmirik və bunu ilk gündən bildiririk. Amma müharibə başlasa, qorxmayacağıq. Əksinə, xalqımız müharibə zamanı daha böyük birlik və harmoniya nümayiş etdirəcək. Biz sülh istəyirik, çalışırıq, lakin ABŞ və İsrailin məqsədi aydındır — İranı parçalamaq və zəiflətmək.”
Aytən Yaşar/ Turkustan.az
