Bu il yay mövsümü ərzində Azərbaycanda daxili turizmdə artım müşahidə olunub. Ötən il Azərbaycanda daxili səfərlərin sayı 23 milyon idisə, bu ilin sonuna həmin göstəricinin 25 milyona çatacağı gözlənilir. Onun da təxminən 40 faizi yay mövsümünə düşür, yəni 10 milyon səfər yayda baş verir. Yay mövsümü Azərbaycanda həm yerli, həm də xarici turistlərin ən çox gəldiyi dövrdür.
Bunu jurnalistlərə açıqlamasında Dövlət Turizm Agentliyinin sədrinin müşaviri Kənan Quluzadə deyib.
K. Quluzadə bildirib ki, iyun-avqust aylarında Azərbaycana gələn xarici vətəndaşların təxminən 32 faizi yay mövsümündə ölkəyə səfər edir: "İlin əvvəlindən bu günə qədər Azərbaycana 1 milyon 478 min xarici vətəndaş səfər edib. Avqustun statistikasına əsasən bu rəqəmin 1 milyon 700 mini keçəcəyi proqnozlaşdırılır. Ötən illə müqayisədə təxminən 1- 2 faiz azalma qeydə alınıb. Bunun səbəbi regionda baş verən geosiyasi dəyişikliklər, münaqişələr və əsas bazarlar olan Rusiya və Hindistandan gələn turistlərin azalmasıdır. Yaxın Şərqdə qarşıdurmalar səbəbindən uçuşların vaxtı uzanıb və çətinləşib. Hazırda bərpa prosesi gedir.
Buna baxmayaraq, digər bazarlar hesabına turizmdə davamlılıq təmin olunur: Bunlar Orta Asiya, Qərbi və Şərqi Avropa, Asiya bazarlarıdır. Bunlar içərisində Pakistan və Çin istiqaməti xüsusi önəm daşıyır. Çin bazarı Azərbaycanın hazırda ən çox diqqət verdiyi istiqamətdir. Bu günlərdə “China Ready” proqramına start verilib, bununla bağlı 100 mütəxəssis hazırlanır ki, artan Çinli turistləri ölkəyə cəlb etmək mümkün olsun. Ümumilikdə dinamika müsbətdir. Körfəz ölkələrindən gələn turistlərin hesabına müəyyən artımlar da var.
İsraildən və Türkiyədən gələn turistlərdə artım müşahidə olunur. Azərbaycanın turizmdə rekord ili 2019-cu il hesab olunur. Hazırda göstəricilər demək olar ki, həmin ilin səviyyəsinə çatıb. Yalnız turist sayı bir qədər azdır. Gəlirlər və məşğulluq və valyuta göstəriciləri üzrə nəticələr rekord ilə eyni səviyyədədir".
