Co Bayden dəri xərçəngindən əməliyyat olunub
Ajans.az xəbər verir ki,bu barədə onun sözçüsü ABŞ-ın CBS News kanalına məlumat verib. Əlavə tibbi detallar isə açıqlanmayıb. 82 yaşlı Baydenin başının sağ tərəfində yaranın müşahidə olunmasından sonra müdaxilə edildiyi bildirilir. Qeyd edək ki, Mohs proseduru xərçəngli toxuma tam çıxarılana qədər dəri qatlarının təmizlənməsi ilə aparılan xüsusi cərrahi üsuldur. Baydenin sağlamlıqla bağlı problemləri ilk dəfə deyil. 2023-cü ildə adi tibbi yoxlamalar zamanı onun döş qəfəsindən də xərçəngli dəri zədəsi çıxarılmışdı. Bu ilin may ayında isə ona sümüklərə yayılmış aqressiv prostat xərçəngi diaqnozu qoyulmuşdu. Sosial media hesabında Bayden bu sözləri yazmışdı: “Xərçəng hamımıza toxunur. Bir çoxlarınız kimi, Jill və mən də qırıldığımız yerdə daha güclü olmağı öyrəndik.” Sabiq prezident daha əvvəl, vəzifəyə başlamazdan öncə də bir neçə melanoma olmayan dəri xərçəngi əməliyyatı keçirib. Co və Jill Baydenlər uzun illərdir xərçənglə mübarizəyə dəstək verirlər. Onların böyük oğlu, Beau Bayden, 2015-ci ildə beyin xərçəngindən vəfat etmişdi.
