Qırğızıstanın Narın və Kazarman hava limanlarının rəsmən açılışı olub.
Hafta.az-ın yazdığına görə, bu barədə Qırğızıstan Hava Limanları ASC-nin Direktorlar Şurasının sədri Manas Samidinov məlumat verib.
Prezident Sadır Japarov Narın hava limanının açılışında oflayn rejimdə, Kazarman hava limanının açılışında isə onlayn iştirak edib.
95 illik tarixə malik Narın hava limanının infrastrukturu, uçuş-enmə zolağı və təhlükəsizlik sistemləri beynəlxalq standartlara uyğunlaşdırılıb. Qeyd olunur ki, Narın hava limanının dirçəldilməsi Qırğızıstanın regional aviasiyasının inkişafı üzrə uzunmüddətli strategiyanın tərkib hissəsidir. Onun bərpası yerli turizmin və iqtisadiyyatın inkişafı üçün mühüm addım olacaq. Digər regionlarla birbaşa hava əlaqəsini təmin edən hava limanı ölkənin nəqliyyat sisteminin mühüm hissəsinə çevriləcək. Onun fəaliyyətə başlaması daxili turizmə, iqtisadi əlaqələrin möhkəmlənməsinə və investisiyaların cəlb edilməsinə yeni təkan verəcək. Dövlətə məxsus Asman Hava Yolları keçən həftə Bişkekdən Narına ilk sərnişin reysini həyata keçirib.
Narın hava limanının tarixi 1930-cu illərdə Salkın-Tor kəndində ilk eniş zolağının meydana çıxması ilə başlayıb. Hazırkı terminal binası 1964-cü ildə, uçuş-enmə zolağı və apron isə 1974-cü ildə tikilib.
Kazarman hava limanının tarixi 1940-cı illərə, kəndin kənarında ilk uçuş-enmə zolağının yarandığı vaxta təsadüf edir. Həmin vaxt bura “Makmalaltın” zavodunun sakinləri və işçiləri üçün nəqliyyat qovşağına çevrilmişdi. 1985-ci ildə müasir terminal və uçuş-enmə zolağı tikildi. Həmin vaxt hava limanı Bişkek, Oş, Cəlal-Abad və Narına müntəzəm reyslər həyata keçirir, dağlıq rayonları ölkənin digər bölgələri ilə birləşdirirdi.
Sonuncu reys 2003-cü ildə edilib. 2008 və 2013-cü illərdə fəaliyyətini bərpa etmək cəhdləri olub, lakin tələbat az olduğundan hava limanı fəaliyyətini davam etdirməyib.
Məlumata görə, hava limanı dəniz səviyyəsindən 1200 metrdən çox yüksəklikdə yerləşir. Onun 1840 metrlik uçuş-enmə zolağı çəkisi 22 tona qədər olan təyyarələri, o cümlədən müasir Dash Q400 təyyarələrini, həmçinin An-2, An-26, Yak-40 və bütün növ helikopterləri qəbul etməyə qadirdir.
2022-2023-cü illərdə genişmiqyaslı yenidənqurma işləri aparılıb, infrastruktur yenilənib. 2018-ci ildə aeroportun terminalı təmir edilib, 2024-cü ilin noyabrında isə Qırğızıstan Hava Limanları ASC-nin İdarə Heyətinin sədri Manasbek Samidinov obyektin istismara tam hazır olduğunu bəyan edib.
Bu gündən etibarən buradan müntəzəm reyslər fəaliyyətə başlayacaq, region sakinləri və Qırğızıstanın qonaqları üçün yeni imkanlar açılacaq.
