Ukraynalı qadının vəhşicəsinə qətlə yetirilməsi ABŞ-da qalmaqala səbəb olub
Ajans.az BBC-ə istinadən xəbər verir ki,Şharlotte Tranzit İdarəsinin cümə günü yaydığı müşahidə kamerası görüntülərində Zarutskayanın qatarda sakitcə oturduğu, 34 yaşlı Kiçik DeKarlos Braun tərəfindən arxadan hücuma məruz qaldığı görünür. Hadisə sosial mediada geniş yayılaraq həm ictimaiyyətin, həm də siyasətçilərin sərt reaksiyasına səbəb olub. Müttəhim DeKarlos Braun birinci dərəcəli qətldə ittiham olunur. Onun keçmiş cinayət stajına baxmayaraq azadlıqda olması ciddi tənqidlərə yol açıb. CNN-in əldə etdiyi məhkəmə sənədlərinə əsasən, Braun əvvəllər silahlı soyğunçuluq, oğurluq və digər cinayətlərə görə səkkiz il həbs cəzası çəkib. Bundan əlavə, onun ruhi xəstəlikləri olduğu və evsiz yaşadığı bildirilir. Şarlotta meri Viola Liles baş verənləri "məhkəmə sisteminin faciəvi uğursuzluğu" adlandırıb və şəhərin ictimai nəqliyyat sisteminə əlavə polis qüvvələrinin yerləşdiriləcəyini vəd edib. O qeyd edib ki, həm təkrar cinayət törədənlərlə, həm də ruhi problemləri səbəbilə küçələrdə yaşayan insanlarla bağlı daha effektiv həll yollarına ehtiyac var. ABŞ Prezidenti Donald Tramp da hadisəyə münasibət bildirərək, qətli "dəhşətli" adlandırıb və Zarutskayanın ailəsinə başsağlığı verib. “Pis adamlar var. Bunun öhdəsindən gəlməyi bacarmalıyıq. Əks halda, ölkəmiz olmayacaq,” – deyə Tramp bildirib. Şimali Karolina qubernatoru Coş Stein sosial şəbəkədə paylaşdığı açıqlamada hadisənin görüntülərindən "şoka düşdüyünü" bildirib və küçələrdə daha çox polis əməkdaşının yerləşdirilməsinin vacibliyini vurğulayıb. O, ştat qanunvericilərini hüquq-mühafizə orqanlarına dəstək verməyə və "zorakı cinayətkarları məsuliyyətə cəlb etməyə" çağırıb. Maraqlıdır ki, hadisə ABŞ-da siyasi müstəvidə də geniş rezonans doğurub. Respublikaçılar və mühafizəkar şərhçilər, hadisəni ədliyyə sistemindəki boşluqların və “proqressiv” yanaşmaların nəticəsi kimi qiymətləndiriblər. Respublikaçı Branden Jones hadisəni Demokrat prokurorların və şeriflərin siyasətinin fəsadı adlandırıb. Florida ştatından konqresmen Randy Fine isə bu cür hallara yol verən hakimlərin məsuliyyətə cəlb olunması üçün qanun layihəsi təqdim edəcəyini bildirib. Meklenberq dairəsinin prokuroru Spenser Merrivezer isə problemin kökündə ruhi xəstəliklərdən əziyyət çəkən şəxslərlə bağlı məhkəmə prosedurlarının ləngliyini göstərib. O bildirib ki, məhkəmələr belə şəxslərin psixi sağlamlıq vəziyyətinin qiymətləndirilməsini gözlədikləri üçün onların məsuliyyətə cəlb olunması prosesi ləngiyir. İrina Zarutskayanın ailəsinin yaydığı nekroloqda qeyd olunub ki, o, 2022-ci ildə ailəsi ilə birlikdə Ukraynadakı müharibədən qaçaraq ABŞ-a yerləşib. Nekroloqda o, “istedadlı və ehtiraslı rəssam”, “heyvansevər” və “ailəsi ilə birlikdə olanda ən xoşbəxt olan” biri kimi təsvir olunub. Zarutskayanın faciəvi ölümü ABŞ cəmiyyətində və siyasətində daha geniş müzakirələrə səbəb olub və cinayətkarlıqla mübarizədə daha sərt addımların atılması tələblərini gücləndirib.
