Bakı, 10 sentyabr, AZƏRTAC
AQEM-in Beyin Mərkəzləri Forumunun əsas məqsədlərindən biri ideyaların paylaşılması ilə yanaşı, ortaq vizyonumuzu genişləndirməkdir. Ancaq bir həqiqəti unutmamalıyıq ki, cəmiyyətlərimizi inklüziv və dayanıqlı etmək mümkün deyil, əgər burada qadınların fəal iştirakı təmin olunmasa.
AZƏRTAC xəbər verir ki, bu sözləri AQEM-in Beyin Mərkəzləri Forumunun 13-cü sessiyası çərçivəsində keçirilən “Yeni Asiya nizamının formalaşması” mövzulu yan tədbirdə Beynəlxalq Münasibətlərin Təhlili Mərkəzinin aparıcı məsləhətçisi Roza Bayramlı deyib.
O qeyd edib ki, qadınlar bütün sahələrdə iştirak edirlər və Asiyada artıq dövlətlərin aparıcı vəzifələrində təmsil olunaraq, müxtəlif təbəqələrin səsini ictimaiyyətə çatdırırlar. Xüsusilə Mərkəzi Asiya ölkələrində qadınlar mühüm rol oynayır, böyük irəliləyişlər əldə edir və innovativ gələcəyə doğru inamla addımlayırlar.
“COVID-19 pandemiyası zamanı da qadınların səsi bir çox Asiya ölkəsində ictimaiyyət üçün güclü dayağa çevrildi. Lakin təəssüf ki, bəzi ölkələrdə qadınlar işçi qüvvəsində geniş təmsil olunsalar da, rəhbər vəzifələrdə hələ də kifayət qədər yer almırlar. Bunun əsas səbəblərindən biri bəzi cəmiyyətlərdə mövcud olan mədəni stereotiplərdir. Bu stereotiplər qadınların liderlik imkanlarına birbaşa təsir göstərir”, - deyə R.Bayramlı vurğulayıb.
O bildirib ki, qadınların yeni ideyalar yaradılması və həyata keçirilməsində daim aktiv rol oynaması vacibdir. Azərbaycanda qadınların icmaların yenidən qurulmasında, xüsusilə müharibədən sonrakı dövrdə fəal iştirakı buna parlaq nümunədir. Azərbaycan qadınlarının ictimaiyyətdəki rolu digər ölkələr üçün də örnək ola bilər.
“Qadınların güclənməsi yalnız sosial həyatda deyil, həm də bütün iqtisadiyyatın transformasiyasında mühüm rol oynayır. Bütün bu problemlərin həlli üçün isə keyfiyyətli təhsilə çıxışın genişləndirilməsi, icmalara daha çox imkan verilməsi, qadın sahibkarlara dəstək göstərilməsi və mövcud stereotiplərin aradan qaldırılması vacibdir. Unutmayaq ki, yeni Asiya nizamı yalnız o zaman tam formalaşa bilər ki, qadınlar və kişilər güclü gələcəyi birlikdə qursunlar”, - deyə R.Bayramlı əlavə edib.
