ABŞ-ın Aydaho ştatında yerləşən bir ərazi kosmosdan baxıldıqda nəhəng "şahmat taxtası"nı xatırladır. Bu maraqlı mənzərə Beynəlxalq Kosmik Stansiyadan çəkilmiş fotoşəkildə əks olunub.
HİT.az xəbər verir ki, məlumatı "Live Science" yayıb.
Görüntüdə Kanadadan təxminən 65 kilometr cənubda, Aydahonun şimal dağlarında, Prist çayı boyunca uzanan sahə təsvir olunub. Ən yaxın tanınmış məkan isə çayın böyük döngəsində yerləşən yanğın müşahidə məntəqəsi "Whitetail-Butte"dir.
Bu "şahmat taxtası" təxminən 8 kilometr enində olub, ümumilikdə 185 kvadrat sahədən ibarətdir. Hər kvadratın sahəsi təqribən 130 min kvadratmetrdir, yəni 24 futbol meydançasına bərabərdir.
NASA-nın Yer müşahidə mərkəzinin məlumatına görə, bu naxış XIX əsrdə qəbul edilən torpaq və meşə idarəçiliyi təşəbbüsünün nəticəsidir. O dövrdə meşələr kvadrat formalı sahələr üzrə növbəli şəkildə qırılır, digər sahələrdə isə yeni ağaclar əkilirdi. Bu üsul həm meşə ekosisteminin qorunmasına, həm də yeni ağacların yetişməsi üçün şərait yaradılmasına imkan verirdi. Hazırkı fotonun sonuncu qırıntıdan bir neçə il sonra çəkildiyi güman edilir.
Xüsusilə diqqət çəkən məqam ondan ibarətdir ki, fotodakı kontrastı qışda qar daha da gücləndirib. Boş kvadratlarda yeni əkilmiş gənc ağacların üstünü örtən qar "ağ" xanalara bənzəyib, dolu sahələr isə "qara" kvadrat təsiri yaradıb. Yay mövsümündə isə bu mənzərə müxtəlif yaşıl çalarları ilə görünür.
Prist çayı uzun illər boyu bölgədə kəsilən ağacların daşınması üçün istifadə olunub. Keçmişdə burada "log driving" adlanan üsulla iri kötüklər çay boyunca üzdürülərək daşınırdı. 1990-cı illərdə bu praktika dayandırılıb və çayın daha rasional istifadəsinə üstünlük verilib.
Samir
