İndoneziyada 10 nəfər itkin düşüb, onlarla insan xəsarət alıb...
Poliqon xəbər verir ki, İndoneziyanın Bali adasında və Şərqi Nusa-Tenggara əyalətində baş verən güclü yağışlar nəticəsində daşqın və torpaq sürüşmələri qeydə alınıb. The Associated Press-in məlumatına görə, hadisə nəticəsində azı 10 nəfər itkin düşüb, 15 nəfər isə həyatla bir araya sığmayan xəsarətlər alıb.
Məlumata görə, sentyabrın 8-də başlayan leysan yağışları çayların məcradan çıxmasına səbəb olub və Balidə doqquz rayon su altında qalıb. Sosial şəbəkələrdə yayılan görüntülərdə avtomobillərin sel sularında üzməsi, hərbçilərin və xilasedicilərin şişmə qayıqlarla uşaqları və yaşlıları evlərin damlarından təxliyə etməsi əks olunub.
Hakimiyyət orqanları təhlükəsizlik məqsədilə elektrik və su təchizatını dayandırıb. Bu səbəbdən mehmanxanalar və xəstəxanalar generatorların köməyi ilə fəaliyyət göstərməyə məcbur olub.
Fövqəladə xidmətlərin məlumatına əsasən, sürüşmələr nəticəsində 15 ev və mağaza dağılıb, bir neçə yol və körpü ziyan görüb. Suyun səviyyəsinin 2,5 metrədək qalxması səbəbindən 800-dən çox insan müvəqqəti sığınacaqlara yerləşdirilib. Pis hava şəraiti və ərazinin relyefi xilasedicilərin işini çətinləşdirir.
Qeyd edək ki, bu ilin yazında Fransanın Yeni Akitaniya regionunda yerləşən Perigö kommunasında da güclü daşqınlar olmuşdu. O zaman İl çayında suyun səviyyəsi 3,43 metrə qalxaraq 1993-cü ildən bəri ən yüksək göstəriciyə çatmışdı.
Poliqon.info
