76 yaşlı qadın qonşusunun üzünə məşəl silahı ilə atəş açmaqda ittiham olunur
Ajans.az xəbər verir ki,Suffolk County Birinci Dairə Məhkəməsinin onlayn sənədlərinə əsasən, Kathleen Schuman ikinci dərəcəli hücum — silahla xəsarət yetirmə ittihamı ilə məhkəmə qarşısına çıxarılıb. Sentyabrın 9-da keçirilən ilkin dinləmədə Schuman özünü təqsirli bilməyib. Onun növbəti məhkəmə iclası sentyabrın 12-nə təyin olunub. Polis məlumatına görə, insident sentyabrın 8-də Qərbi Babylon şəhərində baş verib. İddia edilən qurban – 67 yaşlı Richard Catrone – hadisə nəticəsində üz nahiyəsindən xəsarət alıb və yanağına altı tikiş qoyulub. Məlum olub ki, tərəflər arasında uzun müddətdir ev heyvanları ilə bağlı narazılıq yaşanır. Hadisə yerindən əldə edilən təhlükəsizlik kamerasının (Ring video) görüntülərində Catrone itini gəzdirərkən, arxası kameralara tərəf olan bir qadının ona alovlu cihazla yaxın məsafədən hücum etdiyi əks olunub. Hücumdan sonra Catrone geriyə büdrəyir, daha sonra qadına yaxınlaşaraq onu itələyir və qarşılıqlı fiziki təmas baş verir. NBC New York-un yaydığı məlumata görə, Catrone bildirib ki, qarşı tərəf ona heç bir peşmanlıq əlaməti göstərməyib və onu “şeytan” adlandıraraq, özünü qorumaq məqsədilə hərəkət etdiyini iddia edib. Hadisənin şahidi və qonşu Meri Neitzel isə deyib ki, Catrone uzun müddət Schumanı izləyib və onun pişiyinin itinə zərər verdiyini iddia edib. Neitzelin sözlərinə görə, Schuman bir müddət bacısının evinə köçsə də, bir həftə əvvəl geri qayıdıb və narazılıqlar davam edib. Hadisədən sonra Schuman və Catrone hər ikisi xəstəxanaya yerləşdirilib, lakin həyatları üçün təhlükə olmadığı bildirilib. Məhkəmə Schuman üçün 5000 dollar girov və zərərçəkmişdən uzaq durmaq barədə qadağa qərarı çıxarıb. Yaşayış kompleksinin idarəedicisi olan Conifer MMC hadisə ilə bağlı bəyanat yayaraq bildirib ki, bu insident fərdi xarakter daşıyır və birbaşa icmaya aid deyil. “Sakinlərimizin təhlükəsizliyi və rifahı bizim üçün əsas prioritet olaraq qalır”, – deyə açıqlamada qeyd olunub.
