Dünən Dağıstanın Kaspiysk şəhəri yaxınlığında Xəzər dənizinin üzərində iri ölçülü su burulğanı müşahidə olunub. Şahidlərin sözlərinə görə, bu təbiət hadisəsi o qədər böyük olub ki, hətta sahildəki yaşayış binalarının pəncərələrindən də aydın görünüb.
Musavat.com xəbər verir ki, mütəxəssislər bildirirlər ki, bu cür hadisələr “su burulğanı” və ya “su qasırğası” adlanır. Onlar əsasən isti və rütubətli hava kütlələrinin sürətlə yuxarı qalxaraq soyuq hava ilə toqquşması nəticəsində yaranır. Buludlardan dənizə enən bu konusvari hava sütunu sanki nəhəng bir “boru” formasında olur və çox vaxt güclü küləklə müşayiət edilir.
Əslində, bu burulğanlar atmosferdə yaranan qasırğaların “dəniz üzərindəki forması”dır. Onlar çox vaxt qısaömürlü olur, lakin yaxınlıqda olan gəmilər və kiçik qayıqlar üçün təhlükə yarada bilər.
Meteoroloqlar qeyd edirlər ki, belə təbiət hadisələri əsasən tropik və subtropik iqlim qurşaqlarında rast gəlinir. Xəzər dənizində isə bu tip burulğanların əmələ gəlməsi nadir hadisədir. Buna baxmayaraq, son illərdə qlobal iqlim dəyişikliyi səbəbindən Xəzər akvatoriyasında da bu cür təbiət hadisələrinin qeydə alınması artmaqdadır.
Mütəxəssislər hesab edirlər ki, Kaspiysk yaxınlığında müşahidə olunan burulğan daha çox vizual baxımdan möhtəşəm görünsə də, ciddi dağıntıya səbəb olmayıb.
Musavat.com
