Konkret.az portalından verilən məlumata görə, ain.az xəbər yayır.
Azərbaycanda nikah haqqında şədətnamənin müddətli olması təklif edilir. Bildirilir ki, şəxsiyyət vəsiqəsi, sürücülük vəsiqəsi kimi nikah haqqında şəhadətnamə də 10 illik verilsin, sənədin müddəti bitəndə uzatmaq üçün yenidən müraciət olunsun. Ölkəmizdə hazırda boşanmaların sayının artdığı əsas gətirilərək təklif edilir ki, hətta əmək müqaviləsi kimi beş ildən sonra nikah şəhadətnaməsi müddətsiz olsun.
KONKRET.az xəbər verir ki, Milli Məclisin İnsan hüquqları komitəsinin sədr müavini Arzuxan Əlizadə isə pravda.az-a açıqlamasında deyib ki, bu, olduqca absurd təklifdir və heç bir halda qəbul edilməməlidir.
“Sürücülük, şəxsiyyət vəsiqəsi ilə bağlı müddət tətbiq edilə bilər. Qanunvericilikdə də belə nəzərdə tutulub. Amma nikah şəhadətnaməsinin müddətli verilməsi absurddur. Dünya praktikasında buna rast gəlməmişəm. Bəlkə də, hansısa ölkədə belə bir praktika var, amma bizdə olmamalıdır. Sadəcə, bunun tərəfdarıyam ki, nikah bağlanan zaman eyni zamanda tərəflər arasında müqavilə də bağlanmalıdır. Gələcək münasibətlər həmin müqavilə ilə tənzimlənə bilər. Müqavilədə bir çox məsələlər nəzərə alınmalıdır. Ailənin dayanıqlığı, boşanma olacaqsa, aradakı münasibətlər hansı şərtlərlə çözüləcək, hansı formada qaydasına qoyulacaq – bütün bunlar müqavilədə öz əksini tapmalıdır. Eyni zamanda qanunvericiliyə müvafiq olaraq müəyyən analizlər verilməlidir. Həkim müayinəsi olmalı, sağlamlıq, uyğunluq məsələləri müəyyənləşdirilməlidir. Nikah şəhadətnaməsinin müddətli verilməsi isə heç bir çərçivəyə sığmır. Heç bir halda qəbul edilə biləcək təklif deyil. Sadəcə, ailə institutunu möhkəmləndirmək üçün ciddi addımlar atmalı, genefondumuzun dağılmaması, dayanıqlı olması üçün maarifləndirmə işləri aparmalıyıq. Digər lazımi məsələlərə də xüsusi diqqət yetirilməlidir ki, boşanmaların sayı belə kritik həddə gəlib çatmasın”, – deputat bildirib.
A.Əlizadə vurğulayıb ki, nikah bağlanırsa, ailə dəyərləri, xüsusilə, Azərbaycanın mental dəyərləri nəzərə alınmalıdır: “Təəssüf ki, son illər boşanmaların sayı kəskin surətdə artıb. Görünür, cəmiyyətdə milli dəyərlərin təbliği məsələlərində hansısa yanlışlıqlara yol vermişik. Əslində, bilinir ki, hansı yanlışlıqlar var. Bir çox televiziya kanallarında yayımlanan bayağı verilişlər bu prosesə rəvac verib. Eyni zamanda cəmiyyətdə də bir çox dəyərlər itib. Görünür, buna görə belə acınacaqlı vəziyyət yaranıb. İstənilən halda bu problemin aradan qaldırılması istiqamətində addımlar atılmalı, maarifləndirmə işləri aparılmalıdır. Ailə quracaq gənclərin əvvəlcədən hazırlıqlı olmaları, ailənin məsuliyyətini götürmək bacarığını öz üzərində aşılanmaları və s. – bütün bunlar nəzərə alınmalıdır”.
Sonrakı hadisələr barədə daha çox məlumat almaq üçün ain.az saytını izləyin.
