Musiqi – Millətin Ruhunun Sədası - Ülkər Piriyeva » AzadMedia.az

Bakı, 18 sentyabr — Azadmedia.az


18 sentyabr Azərbaycanda xüsusi bir gün – Musiqi Günü kimi qeyd olunur. Bu tarix, dahi bəstəkar Üzeyir Hacıbəylinin doğum günü ilə bağlı olaraq seçilib. Təsadüfi deyil ki, Azərbaycan musiqisinin banisi olan Üzeyir bəy, milli kimliyimizin, mədəniyyətimizin və mənəviyyatımızın səsini bütün dünyaya tanıdan bir zirvədir.

Musiqi sadəcə notlardan ibarət deyil – o, insan ruhunun, millətin yaddaşının, tarixin nəfəsinin sədasıdır. Xalq mahnılarımızda yüzillərin izləri, muğamlarımızda əbədi hikmətlər, klassik əsərlərimizdə modernləşən Azərbaycan ruhu yaşayır. Hər bir ifaçı, hər bir musiqiçi bu dəyərlərin daşıyıcısı və gələcək nəsillərə ötürücüsüdür.

Bu gün biz yalnız Üzeyir Hacıbəylinin irsini anmırıq, həm də hər bir musiqiçini – tarın simlərinə həyat verən ustadları, saksafonun sədası ilə dünyanı coşduran ifaçıları, səhnədə ürəklərə toxunan gənc istedadları səmimiyyətlə təbrik edirik. Çünki musiqiçisiz həyat susqun olar, musiqisiz millət isə ruhunu itirər.

Azərbaycan musiqisi bu gün təkcə milli sərvət deyil, həm də beynəlxalq mədəniyyət xəzinəsinin bir parçasıdır. Qarabağdan yüksələn muğam sədaları, Bakıdan dünyaya yayılan caz melodiyaları, gənclərin ifasında yeni nəfəs alan bəstəkar əsərləri – hamısı Azərbaycanı tanıdır, sevdirir.

Bu sahədə xüsusi olaraq vurğulamaq lazımdır ki, Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyeva muğam sənətinin qorunması və dünyada tanıdılması istiqamətində mühüm və tarixi xidmətlər göstərmişdir. Onun təşəbbüsü ilə muğam sənəti UNESCO-nun Qeyri-Maddi Mədəni İrs Siyahısına daxil edilmiş, paytaxtımızda Muğam Mərkəzi inşa olunmuş, ölkəmizin müxtəlif bölgələrində muğam müsabiqələri təşkil edilmiş, gənc xanəndələrin inkişafına geniş şərait yaradılmışdır.

Xalqımızın milli-mədəni irsinin ayrılmaz hissəsi olan Qarabağ muğam məktəbi bu gün də böyük ifaçıların yaradıcılığı ilə yaşayır və inkişaf edir.

Azərbaycan muğam məktəbinin özəyini isə Qarabağ muğam məktəbi təşkil edir. Bu məktəbin inkişafında görkəmli xanəndələrimiz – Bülbül, Xan Şuşinski, Seyid Şuşinski, Zülfü Adıgözəlov, Arif Babayev, Mənsum İbrahimov xüsusi yer tutur.

Bu gün tanınmış muğam ifaçısı, Xalq artisti Mənsum İbrahimovun rəhbərlik etdiyi “Qarabağ” muğam qrupu milli musiqimizin dünyada tanıdılmasında böyük rol oynayır. Qrupun üzvləri – Əməkdar artistlər
Elnur Əhmədov (kamança ifaçısı) və Elçin Həşimov (tar ifaçısı) və həmçinin digər istedadlı musiqiçilər birlikdə muğam sənətimizin zəngin ənənələrini yaşadır və beynəlxalq səhnələrdə Azərbaycan mədəniyyətini yüksək peşəkarlıqla təmsil edirlər.

Qarabağdan gələn qələbə xəbərləri ilə yanaşı, muğamın yenidən öz doğma yurduna – Şuşaya qayıdışı da milli mədəniyyətimizin qələbəsi oldu. Bu gün Şuşada təşkil olunan muğam festivalları həm xalqımızın zəfərini, həm də musiqimizin əbədiliyini simvolizə edir.

Beləliklə, 18 sentyabr Musiqi Günü yalnız ifaçıların bayramı deyil, həm də Azərbaycan musiqisinin dünyaya səs saldığı, muğamın bir mədəniyyət körpüsünə çevrildiyi gün kimi tariximizə yazılır.

Musiqi Günündə bütün musiqiçilərə bir daha minnətdarlıq düşür: onların zəhməti ilə biz sevinci də, kədəri də, vətən sevgisini də daha dərindən yaşayırıq.

Bayramınız mübarək olsun, əziz musiqiçilər! Siz Azərbaycanın ürək döyüntüsüsünüz.

Jurnalist Ülkər Piriyeva