Asiya ticarətində bazar ertəsi neft qiymətləri Avropa və Yaxın Şərqdə geosiyasi gərginliyin təsiri ilə artıb, lakin əlavə təklif və ticarət rüsumlarının qlobal tələbi zəiflətməsi artımı məhdudlaşdırıb.
Banker.az xəbər verir ki, Brent fyuçersləri 34 sent və ya 0,54% bahalaşaraq 67,07 dollar, WTI oktyabr müqaviləsi isə 63,02 dollar olub. Daha aktiv noyabr müqaviləsi 62,76 dollara yüksəlib.
Analitiklər bildirir ki, Rusiyanın Polşa sərhədi yaxınlığında gərginlik yaratması Avropanın enerji təhlükəsizliyi risklərini bir daha gündəmə gətirib. Polşa və müttəfiq təyyarələr hava məkanının qorunması üçün havaya qalxıb. Bundan öncə Rusiya təyyarələri Estoniya hava məkanını pozub, Almaniya isə Baltik dənizi üzərində rus hərbi təyyarəsinin neytral hava məkanına daxil olduğunu açıqlayıb. BMT Təhlükəsizlik Şurası məsələni müzakirə edəcək.
Ukrayna son həftələr Rusiyanın enerji infrastrukturuna pilotsuz aparatlarla hücumları artırıb. ABŞ prezidenti Donald Tramp Avropa İttifaqını Rusiyadan enerji alışını dayandırmağa çağırıb. Yaxın Şərqdə dörd Qərb ölkəsinin Fələstini tanıması İsrailin sərt reaksiyasına səbəb olub.
Ötən həftə Brent və WTI bir faizdən çox ucuzlaşaraq tələbin zəifləməsi və təklifin artması ilə bağlı narahatlıqları əks etdirib. ABŞ Federal Ehtiyat Sisteminin faiz azaldılması istehlakı dəstəkləsə də, təsiri məhdud qalıb.
İraqın SOMO şirkəti hasilat ixtisarlarını azaltdıqdan sonra ixracı artırıb. Avqustda gündəlik ixrac 3,38 milyon barel olub, sentyabrda isə 3,4–3,45 milyon barel gözlənilir.
Analitik Tim Evans qeyd edib ki, ehtiyatların artması təklifin tələbi üstələdiyini göstərir. Çin və ABŞ-ın strateji ehtiyat toplaması artıq təklifi qismən udsa da, əlavə ehtiyatlar qiymətlərin qısamüddətli yüksəlişini məhdudlaşdırır və eniş riskini açıq saxlayır.
