Azərbaycan Respublikasının İnsan Hüquqları üzrə Müvəkkilinin (Ombudsmanın) Şimal, Şimal-Qərb, Qərb və Cənub Regional Mərkəzləri tərəfindən 20 Sentyabr - Dövlət Suverenliyi Günü ilə əlaqədar yerli icra və yerli özünüidarəetmə orqanlarının əməkdaşlarının və sakinlərin iştirakı ilə hüquqi maarifləndirici tədbirlər keçirilib.
XQ xəbər verir ki, tədbirlər zamanı bu əlamətdar günün təsis edilməsi ilə bağlı ölkə Prezidentinin 2024-cü il 19 sentyabr tarixli Sərəncamı, suverenliyimizi qoruyub saxlaya bilməyimiz üçün müxtəlif dövrlərdə ölkəmizin üzləşdiyi çətinliklər, 2023-cü ilin sentyabr ayında həyata keçirilmiş antiterror əməliyyatları, o cümlədən uzun müddət işğal altında qalan əzəli torpaqlarımızın azad edilməsi nəticəsində ərazi bütövlüyümüzün və suverenliyimizin bərpa olunması barədə məlumat verilib.
Tədbir iştirakçıları, həmçinin Azərbaycan Ombudsmanı tərəfindən şəhid ailələrinin və müharibə iştirakçılarının hüquqlarının müdafiəsi sahəsində görülən işlər barədə məlumatlandırılıb, eləcə də bu il ölkəmizdə qeyd olunan “Konstitusiya və Suverenlik İli” çərçivəsində Ombudsman tərəfindən təsdiq olunmuş tədbirlər planı çərçivəsində insan hüquq və azadlıqlarının müdafiəsi istiqamətində görülən işlər iştirakçıların diqqətinə çatdırılıb.
