“Robert Bosch” şirkəti avtomobil bazarındakı durğunluq və artan rəqabət səbəbindən avtomobil ehtiyat hissələri üzrə fəaliyyət sahəsində daha 13 min nəfəri işdən azad edəcək.
FED.az xəbər verir ki, şirkət cümə axşamı yaydığı açıqlamada bildirib ki, qlobal işçi qüvvəsinin təxminən 3 faizini təşkil edən ixtisarlar əsasən Almaniyadakı zavodlarda həyata keçiriləcək və bu proses 2030-cu ilədək davam edəcək.
Son illərdə minlərlə işçini ixtisar etməsinə baxmayaraq, Bosch-un mobillik bölməsi ildə təxminən 2,5 milyard avro zərərlə üzləşməkdə davam edir.
Almaniya sənayesinə təzyiq artır
Bosch-un bu addımı - avtomobil istehsalçıları və tədarükçülərinin gömrük rüsumları, zəif tələbat və Çin şirkətlərinin artan rəqabəti ilə mübarizə apardığı bir vaxtda Almaniyanın sənaye infrastrukturuna artan təzyiqi göstərir. Bundan əlavə, Avropanın ən böyük iqtisadiyyatında demoqrafik təzyiqlər əmək xərclərini artırır.
Rəqiblər də xərcləri azaldır
Avtomobil istehsalçıları qiymətləri aşağı salmağa çalışarkən, bir çox təchizatçı öz artan istehsal xərcləri ilə üzləşir. Volkswagen və Porsche Çində zəif satışları və ABŞ tariflərinin təsirini kompensasiya etmək üçün həm işçi sayını, həm də istehsal gücünü azaldır.
Çin şirkətləri isə daha ucuz batareya, mühərrik və elektron komponentlərlə bazar paylarını artıraraq ənənəvi istehsalçıların mənfəət marjlarını sıxışdırır. Bosch-un rəqibləri olan Continental AG və ZF Friedrichshafen AG də xərcləri azaltmağa məcbur olur.
Bosch-un mobillik bölməsinə cavabdeh olan idarə heyəti üzvü Markus Heyn bildirib:
“Geosiyasi gərginliklər və gömrük rüsumları kimi ticarət maneələri bütün şirkətlər üçün ciddi qeyri-müəyyənlik yaradır. Rəqabətin daha da kəskinləşəcəyini gözləyirik. Ona görə də məqsədimiz hər yerdə inkişaf imkanlarını dəyərləndirmək və dünya üzrə mobillik mərkəzlərimizi gələcəyə hazırlamaqdır.”
İxtisarların zavodlar üzrə bölgüsü
2023-cü ilin sonuna qədər Bosch-un 417 min 900 əməkdaşı var idi.
Stuttgart bölgəsindəki ən qədim istehsal müəssisəsində 2030-cu ilədək 3 min 500 nəfər işini itirəcək.
Schwieberdingen zavodunda 1750 nəfərin işdən azad olunması nəzərdə tutulur.
Waiblingen-dəki 560 nəfərlik zavod isə 2028-ci ilə qədər bağlanacaq.
Bühl şəhərindəki müəssisədə 1 550, Hamburqdakı zavodda isə 1 min 250 nəfərin ixtisar edilməsi planlaşdırılır. (Marja)
