Hər il sentyabrın 27-də qeyd olunan Dünya Turizm Günü qlobal miqyasda turizmin sosial, mədəni və iqtisadi inkişafdakı rolunu xatırladan mühüm bir tarixdir. Birləşmiş Millətlər Təşkilatının Dünya Turizm Təşkilatı (UNWTO) tərəfindən 1979-cu ildə təsis olunan bu günün məqsədi insanların diqqətini turizmin iqtisadiyyatdakı payına, xalqlar arasında mədəni dialoqun güclənməsinə və davamlı inkişaf hədəflərinə verdiyi töhfəyə yönəltməkdir.
Müasir dünyada turizm, sadəcə istirahət və əyləncə sektoru deyil, həm də qlobal iqtisadiyyatın ən dinamik sahələrindən biridir. Statistikalara görə, turizm dünya ÜDM-in təxminən 10 faizini təşkil edir, milyonlarla insan üçün məşğulluq mənbəyidir. Bu sahə, həmçinin infrastrukturun inkişafına, xidmət sektorunun təkmilləşməsinə və beynəlxalq əməkdaşlığın güclənməsinə xidmət edir.
Azərbaycan üçün də turizm milli iqtisadiyyatın şaxələnməsi siyasətində xüsusi yer tutur. Xəzərin sahilində yerləşən Bakıdan tutmuş dağ turizminin inkişaf etdiyi bölgələrə qədər ölkənin hər guşəsi beynəlxalq qonaqlar üçün maraqlı imkanlar yaradır. UNESCO-nun Dünya İrs Siyahısına daxil olan Qobustan qaya rəsmləri, İçərişəhər və Şəki Xan Sarayı Azərbaycanı turizm xəritəsində fərqləndirən əsas nümunələrdəndir. Dövlət tərəfindən həyata keçirilən infrastruktur layihələri, viza prosedurlarının sadələşdirilməsi, beynəlxalq tədbirlərin Bakıda təşkili ölkənin turizm imkanlarını daha da genişləndirmişdir.
Lakin çağdaş turizm yalnız iqtisadi qazanc mənbəyi deyil, həm də mühüm ekoloji və sosial məsuliyyət tələb edən sahədir. Dünya ölkələri üçün əsas hədəflərdən biri dayanıqlı turizm modelinin qurulmasıdır. Bu model ekosistemin qorunması, yerli icmaların rifahı və mədəni irsin yaşadılması ilə sıx bağlıdır. İqlim dəyişikliyi, kütləvi turizmin təbiətə təsiri və rəqəmsal platformaların sürətli inkişafı turizmin gələcəyini müəyyən edən əsas faktorlar kimi qiymətləndirilir.
Dünya Turizm Günü həm də xalqlar arasında ünsiyyətin və sülhün təşviqi baxımından əhəmiyyət daşıyır. Mədəniyyətlərarası əlaqələrin güclənməsi, tolerantlıq və qarşılıqlı hörmət müasir dünyada sabitlik üçün vacib şərtlərdir. Turizm isə bu dəyərlərin həyata keçməsi üçün ən effektiv vasitələrdən biri hesab olunur.
Dünya Turizm Günü yalnız bayram xarakteri daşımır. O həm dövlətlər, həm də cəmiyyət üçün bir çağırışdır – dayanıqlı inkişafın təmin olunması, mədəni irsin qorunması, ekoloji balansın saxlanması və insanların rifahına yönəlmiş siyasətlərin formalaşdırılması çağırışı. Azərbaycanın bu istiqamətdə atdığı addımlar, turizmi strateji sahə kimi inkişaf etdirmək səyləri ölkənin beynəlxalq mövqeyini gücləndirməklə yanaşı, həm də milli maraqların təmininə xidmət edir.
S.ELAY
XQ
