“Blokçeyn texnologiyası məlumatların mənşəyinə etibar etməyin mümkün olmadığı hallarda effektiv həll kimi tətbiq oluna bilər”.
Hafta.az xəbər verir ki, bu fikirləri Bakıda keçirilən “INMerge Innovation Summit 2025” çərçivəsində çıxış edən “Change The Block” şirkətinin rəhbəri Alan Draguilov səsləndirib.
Alan Draguilov bildirib ki, blokçeynin əsas prinsipləri mərkəzləşməmək və etibar üzərində qurulub:
“Biz indi çox məlumat toplayırıq və bu məlumatlara etibar edirik. Lakin bəzi məlumatların mənbəyindən 100 faiz əmin deyilik. Elə burada “blockchain” texnologiyasından istifadə etmək mümkündür”.
Mütəxəssis əlavə edib ki, blokçeyn məlumatın dəyişdirilməzliyini təmin edir:
“Məsələn, siz öz məlumat bazanızı auditoriyaya təqdim edə bilərsiniz, lakin onu dəyişmək imkanı hələ də var. Blokçeyn isə yalnız məlumatın kriptoqrafik ölçüsünü qeyd etməklə onun istifadə edildiyini təsdiq etməyə imkan verir və əlavə etibar yaradır”.
Alan Draguilov qeyd edib ki, blockchain-in tətbiqi yalnız böyük xərclər tələb edən bütün məlumatların qeyd olunması deyil, əsasən məlumatın doğruluğunu təsdiqləmək üçün seçilmiş göstəricilərin qeyd olunması üzərində qurulmalıdır.
