Azpolitika.az portalından verilən məlumata əsasən, ain.az bildirir.
Etibar ƏLİYEV
İbrahim Nəbioğlunun “Gələcək çox tez gələcək” kitabının təbliğatı artıq hamını bezdirib. İbrahim Nəbioğlu kitabı şouya çevirir. Ciddi ölçüləri pozur, kitaba münasibəti dayazlaşdırır. Nə məsələdir? Nə baş verib?
Professor Həsən Quliyev, Rəhman Bədəlov, Qorxmaz Quliyev, Azad Mirzəcanzadə, Kamal Abdulla, Rafiq Əliyev, Qulu Məhərrəmli, Əkbər Nəcəf, Güntay Gəncalp, Aydın Balayev kimi elm adamlarının kitabları bir qıraqda qalıb, bir avantüristin kitabı ilə Azərbaycan cəmiyyətini məşğul ediblər.
Açığı Azərbaycanda elmin populyarlaşdırılamasının nümayəndəsi kimi bu kitab məni də maraqlandırdı. Aldım kitabı. İlk qənaətim: Nəbioğlu kəskin narsisizim xəstəliyinə tutulmuş birisidir. Narsistlərin kitabını oxumurlar. O, kitab haqqında təsəvvürləri cılızlaşdırır və təcrübəsiz oxucuları yanıldır. Onun bu kitabı gələcək yox, özü haqqındadır. Valter Benyaminin gözəl bir fikri var: “Əsl müəllif “mən”ini gizlətməyi bacarmalıdır”...
İbrahim Nəbioğlu sistem təfəkkürə malik olmadığına görə onun kitabı elmi ədəbiyyat sayıla bilməz. Kitabda istinadların mənbəyi göstərilmir; plagiatlıq açıq-aşkar görünür. Kitabın “Təhsilimiz, Ana dilimiz, gələcəyimiz” bölməsi müəllifin mətbuatda çap olunmuş məqalələrdir. Bu məqalələrdə özünün şəxsi nəzər-nöqtəsi ilə insanları təhdid edir. Bu, yolverilməzdir.
Kitabın 24 səhifəsi Azad Mirzəcanzadə haqqındadır. Özünün təbliği üçün böyük alimin adından sui-istifadə edib. Azad müəllimin yanında boy atmağa çalışır.
Azad Mirzəcanzadənin İbrahim Nəbioğluna göz vurmaqlığı
Sitat: “Böyük dissident alim (?) Azad müəllimin sovetin müxtəlif yerlərindən, müxtəlif millətlərdən olan aspirantları vardı. Azad müəllim elmin gələcək inkişafı barədə danışarkən sənaye inqilablarını xatırlatdı və bir pauza verərək: “Baxın, sənaye inqilablarının üçü də eyni coğrafiyada baş verib”,-dedi. Oturduğum partanın yanından keçərkən mənə göz vuraraq Azərbaycan dilində: “Deyə bildim? - dedi. O baxışlarını heç unutmuram”. Demək istəyir ki, Azad müəllimin arada göz vurmağı da var imiş.
İbrahim Nəbioğlunun fraktallar yalanı
Yazır: “Azad müəllim fraktalları izah edərkən birdən geri dönüb gözləri ilə məni tapdı. Fraktalın nə olduğunu bilirsinizmi? –soruşdu”. İbrahim Nəbioğlu fraktal anlayışını izah edə bilməzdi. O dövrlər bu anlayışı Benua Mandelbrot ortaya atmışdı. Oxucu üçün bu anlayışı maraqlı etmək üçün onun mənasını vermək lazım idi. Nəbioğlunun məqaləsindən görsənir ki, “fraktal” anlayışını kitabda da izah edə bilmir. Bir yerdə sinergetikanın mühüm anlayışı olan “bifrukasiya” anlayışının adını çəkir. Təəssüflər olsun ki, bu anlayışın da mənasını oxucuya izah edə bilmir.
Azad müəllimin adından sui-istifadə etmək əxlaq normalarına uyğun gəlmir. Bu nəhəng alimin davamçıları var. Kimlər ki, elmdə onun yolunu gedibsə davamçılar onlardır. İbrahim Nəbioğlu Azad müəllimin dərs dediyi minlərlə tələbənin biridir, lakin böyük alimin elmindən üz döndərərək jurnalistikaya üz tutub. Məqələlərində hər dəfə Azad müəllimin adını çəkməklə təfəkkürünə elmi don geyindirməyə çalışır.
Kitabın böyük bir hissəsi illər üzrə internetdə yer alan Nobel mükafatı laureatları haqqındadır. Bunlar informasiya xarakterli internet məlumatlarıdır. Bu məlumatları kitaba daxil etmək elmi yenilik deyil, plagiatlıqdır...
İbrahim Nəbioğlunun erməni sevgisi
İbrahim Nəbioğlu “Dolma və silikon” məqaləsində Armen Sarqisyanın timsalında ermənilərin İT sahəsində qazandığı uğurlardan yazır. Sitat: “Ermənistanın sabahlarının açarı onu beyin gücüdür (?) ABŞ Ticarət Nazirliyinin hesablamalarına görə, Ermənistan MDB ölkələri arsında adambaşına düşən ixtira sayına görə birincidir. Ermənilər öz qurtuluş yolunu elmdə, yeni texnologiyalarda görür və bunun üçün də sistemli fəaliyyət göstərir. Əllərində məhdud maliyyə imkanlarını modern gənclər yetişdirməyə xərcləyir”.
Ermənilər nəyi ixtira edib? Bu ölkənin universitetləri reytinqlərdə ən aşağı yerlərdə qərarlaşıb.
“Onlara qibtə edirəmmi?” essesində (səh 228) İ. Nəbioğlu yazır:
“Ermənilər sevinirlər.
Həm də çox. Və buna haqları da var.
Erməniəsilli alim dünyanın ən prestijli mükafatına – Nobelə layiq görülüb.
Söbət Livanın payraxtı Beyrutda bir erməni ailəsində doğulan Ardem Pataputyanın fiziologiya və tibb üzrə Nobel mükafatına layiq görülməsindən gedir”.
Nəbioğlu davam edir:
“Ermənilər sevinirlər.
Onlara qibtə edirəmmi?
Edirəm, həm də çox.
O qədər çox ki sözlə ifadə edə bilmirəm.
İstəyirəm bizdən də belə alimlər çıxsın.
İstəyirəm biz də elm tarixinə düşək.
Tədrislə, təhsilin dili ilə bağlı fikirlərimdə nə qədər haqlı olduğumu görürəm yenə...”
İbrahim Nəbioğlu anlamır ki, Pataputyan heç Ermənistanın üzünü görməyib. 300-dən çox yəhudi Amerika elm mühitində Nobelə layiq görülüb. Ermənini kitaba salmağa nə ad qoymaq olar?
Kitabın 6-cı fəslində “Nobel mükafatı cazibəsi” başlığı altında dərc olunan məqalələr internet materiallarıdır. Təhlil yoxdur. Mənbə göstərilmir, 48 səhifə plagiatdır. Hamının bildiyi informasiyalardır.
İbrahim Nəbioğlu belə bir kitabla Azərbaycan cəmiyyətini ovsunlaya bilibsə, vallah qoçaq adamdır.
Adam bəs haralı olar?
Bu məqaləsində İbrahim müəllim Şimali Amerika alimlərinin daha çox elm sahələri üzrə Nobelə layiq görülmələrinin səbəbini izah edə bilməyib. Problemdən tam məlumatsızdır. Oxucunu çaşdırır. Bu məqalədə bircə maraqlı məqam var. İzah edə bilməyəndə məlum ləhcəyə müraciət edib: “Ağrın alem, bə adam haralı olar?!”
Erməni əsilli Daron Əcəmoğlunu da xeyli tərifləyib. Bu fonda biz azərbaycanlıları həqarət edib. Sitat: “Bizim Tolstoyevski isə balasını rusca oxudur, uşaq məktəbə sanki 11 illik rus dili kurslarına gedir. 170 balla universitetə girir, 4 il ayaq döyür, başında yellər, əlində bir kağız parçası məzun olur...”
Zəruri qeyd: Kitabda böyük alimlər və filosoflar haqqında verilən məlumatlar çox bəsitdir. Mətnlər arasında məntiqi əlaqə yoxdur.
İbrahim Nəbioğlunun kitabına kitabxanamda yer tapa bilmədim. Elsonun Bukinistinə verəcəm. Əsl Bukinistlik kitabdır.
Ən son xəbərləri və yenilikləri almaq üçün ain.az saytını izləyin.
