Oktyabrın 9-da Bakıda, Gülüstan sarayında Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının təşkilatçılığı ilə İtkin düşmüş şəxslər üzrə Bakı Dialoqu çərçivəsində “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda beynəlxalq konfrans çərçivəsində sessiyalar təşkil edilib.
APA xəbər verir ki, konfransın birinci sessiyası “İtkin düşmüş şəxslər böhranının həlli üçün əməkdaşlığın gücləndirilməsi” mövzusuna həsr olunub.
Meksikadan olan insan hüquqları üzrə ekspert Kristofer Ballinas Valdesin moderarorluğu ilə keçirilən sessiyada Türkiyənin ailə və sosial xidmətlər nazirinin müavini Zəfər Tarıkdaroğlu, Ukrayna Ali Radasının insan hüquqları üzrə komissarı (Ombudsman) Dmitro Lubinets, Macarıstan Konstitusiya Məhkəməsinin hakimi Akos Kozma, Franko-Britaniya Fondunun səfiri Ceffri Kardoso, İslam Əməkdaşlıq Təşkilatının Müstəqil Daimi İnsan Haqları Komissiyası Katibliyinin sədr müavini, səfir xanım Mahi Həsən Əbdül-Lətif, Zambiya Milli Assambleyasının Təhlükəsizlik və Xarici Əlaqələr Komitəsinin sədr müavini xanım Sibongile Muamba, Beynəlxalq insan hüquqları hüququ üzrə ekspert xanım Afərin Şahidzadə, Pakistan Ali Məhkəməsinin vəkili Məhəmməd Sohail Səcid və digərləri çıxış ediblər. Sessiyada çıxış edən ekspertlər və rəsmilər vurğulayıblar ki, itkin düşmüş şəxslər problemi yalnız regional deyil, bütün insanlığın ortaq vicdanını narahat edən qlobal məsələdir. Bu problemin həlli dövlətlərin humanitar öhdəliyidir və beynəlxalq əməkdaşlıq, məlumat mübadiləsi və həmrəylik burada olduqca vacibdir.
“İtkin düşmüş şəxslərin axtarışı üzrə milli təcrübələr: itkin düşmüş şəxslərin qalıqlarının tapılması və bərpası, həmçinin məhkəmə-tibbi identifikasiya ilə bağlı irəliləyişlər və çətinliklər” mövzusuna həsr olunan ikinci sessiyaya isə BQXK-nin məhkəmə tibbi üzrə Avropa və Mərkəzi Asiya üzrə regional meneceri Elif Günce Eskiköy moderatorluq edib. Sessiyada Azərbaycanın Dövlət Təhlükəsizliyi Xidmətinin Hərbi-tibb Baş İdarəsinin rəisi Rüfət Əliyev, ABŞ Müdafiə Nazirliyinin nümayəndəsi Qreqori Berq, Serbiya Qaçqınlar və Miqrasiya Komissarlığından xanım Vesna Boskoviç, Ankara Universitetinin bölmə rəhbəri Ayla Sevim Erol, Polşanın Milli Yaddaş İnstitutunun əməkdaşı Maqdalena Krayevska, Azərbaycan Səhiyyə Nazirliyinin Məhkəmə Tibbi Ekspertiza və Patoloji Anatomiya Birliyinin direktoru Ədalət Həsənov və digərləri çıxış ediblər. Çıxışçılar vurğulayıblar ki, itkin düşmüş şəxslərin qalıqlarının tapılması, bərpası və məhkəmə-tibbi identifikasiya sahəsində irəliləyişlər əldə olunsa da, bu sahədə ciddi çətinliklər qalmaqdadır. Beynəlxalq əməkdaşlıq, təcrübə mübadiləsi və müasir elmi-tibbi texnologiyaların tətbiqi bu humanitar problemin həllində əsas istiqamətlərdir.
“İtkin düşmüş şəxslərin ailələrinin təcrübələri: Onların ehtiyac və çətinliklərinin müəyyən edilməsi, əməkdaşlıq və tərəfdaşlıq sahələri” mövzusunda üçüncü sessiyaya isə Azərbaycan Qızıl Aypara Cəmiyyətinin nümayəndəsi Şaban Şayev moderatorluq edib. Sessiyada Azərbaycandan olan ailələrin nümayəndələri Könül Behbudova və Püstəxanım Rəhimova, həmçinin Bosniya və Herseqovinadan olan ailələrin nümayəndələri Boyan Starçeviç, Mideta Kaloper və Vesna Pavloviç fikirlərini bölüşüblər.
***
18:19
Oktyabrın 9-da Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının (Dövlət Komissiyası) təşkilatçılığı və müvafiq sahədə fəaliyyət göstərən təsisatların nümayəndələrinin iştirakı ilə İtkin düşmüş şəxslər üzrə Bakı Dialoqu çərçivəsində “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda növbəti beynəlxalq konfrans keçirilib.
APA xəbər verir ki, öncə Azərbaycan Respublikasının Prezidenti İlham Əliyevin beynəlxalq konfransın iştirakçılarına müraciəti oxunub.
Daha sonra Dövlət Təhlükəsizliyi Xidmətinin (DTX) rəisi, Dövlət Komissiyasının sədri Əli Nağıyev çıxış edib.
Sonra konfransın mövzusu ilə bağlı digər iştirakçılar çıxış edib.
Konfrans çərçivəsində panel sessiyaları olub, Dövlət Komissiyası ilə Bosniya və Herseqovinanın İtkin düşmüş şəxslər İnstitutu arasında əməkdaşlıq memorandumunun imzalanması mərasimi keçirilib.
***
10.28
Oktyabrın 9-da Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının (Dövlət Komissiyası) təşkilatçılığı və müvafiq sahədə fəaliyyət göstərən təsisatların nümayəndələrinin iştirakı ilə İtkin düşmüş şəxslər üzrə Bakı Dialoqu çərçivəsində “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda növbəti beynəlxalq konfrans keçirilir.
APA xəbər verir ki, öncə Azərbaycan Respublikasının Prezidenti İlham Əliyevin beynəlxalq konfransın iştirakçılarına müraciəti oxunub, daha sonra Dövlət Təhlükəsizliyi Xidmətinin (DTX) rəisi, Dövlət Komissiyasının sədri Əli Nağıyev çıxış edib.
Xidmət rəisi itkin düşmüş şəxslərlə bağlı artıq üçüncü ildir təşkil olunan beynəlxalq tədbirin məqsəd və əhəmiyyəti barədə məlumat verib, Prezident İlham Əliyevə konfransın keçirilməsində göstərdiyi dəstəyə görə minnətdarlığını bildirərək, itkin düşmüş vətəndaşlarımızın taleyinin aydınlaşdırılması məsələsində dövlətimizin başçısının qətiyyətli və prinsipial mövqeyini qeyd edib.
Hazırda Dövlət Komissiyasında 3990 nəfərin itkin şəxs kimi qeydiyyata alındığını, bu vaxtadək işğaldan azad edilmiş ərazilərdə aparılmış qazıntılar zamanı aşkarlanmış 29 kütləvi məzarlıqdan 218 şəxsə aid olduğu ehtimal edilən meyit qalıqlarının müəyyən olunaraq ekshumasiya edildiyini vurğulayan DTX-nin rəisi Əli Nağıyev itkin düşmüş şəxslərdən artıq 187 nəfərinin şəxsiyyətinin eyniləşdirilərək ailələrinə təhvil verildiyini, habelə axtarış-qazıntı işləri nəticəsində Ağdərə rayonunun Ballıqaya kəndi ərazisində növbəti kütləvi məzarlığın aşkarlandığını diqqətə çatdırıb.
Dövlət Komissiyasının sədri 8 avqust 2025-ci il tarixində Amerika Birləşmiş Ştatlarının paytaxtı Vaşinqton şəhərində paraflanmış “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis olunması haqqında Saziş” layihəsinin 9-cu maddəsinin itkin şəxslərin taleyinin müəyyən edilməsi sahəsində qarşılıqlı fəaliyyətin həyata keçirilməsini nəzərdə tutduğunu, Azərbaycanın və Ermənistanın aidiyyəti dövlət komissiyaları arasında son vaxtlarda mütəmadi əsasda davam edən təmasların, həmçinin müvafiq beynəlxalq qurumlarla əməkdaşlığın genişləndirilməsinin bu işə töhfə vərəcəyinə ümidvar olduğunu deyib.
Sonra konfransın mövzusu ilə bağlı digər iştirakçılar çıxış edib. Konfrans çərçivəsində panel sessiyaları olacaq, Dövlət Komissiyası ilə Bosniya və Herseqovinanın İtkin düşmüş şəxslər İnstitutu arasında əməkdaşlıq Memorandumunun imzalanması mərasimi keçiriləcək.
***
09:43
İtkin düşmüş şəxslər üzrə Bakı Dialoqu çərçivəsində keçirilən “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda beynəlxalq konfrans öz işinə başlayıb.
APA xəbər verir ki, tədbirdə Azərbaycan Respublikasının Prezidenti İlham Əliyevin konfrans iştirakçılarına müraciəti oxunub.
Müraciəti Dövlət Təhlükəsizliyi Xidmətinin rəisi, Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri, general-polkovnik Əli Nağıyev oxuyub.
Qeyd edək ki, konfrans 9-11 oktyabr tarixlərini əhatə edəcək.
