Musavat.com xəbər verir ki, ABŞ prezidenti Donald Tramp növbəti dəfə Ukrayna müharibəsi barədə qalmaqallı açıqlama verib. O, “Fox News” telekanalına müsahibəsində bildirib ki, Rusiya prezidenti Vladimir Putin Ukrayna ilə münaqişə nəticəsində müəyyən əraziləri əldə edəcək və bu, “qaçılmaz reallıqdır”.
Trampın sözlərinə görə, hazırkı müharibənin sonu “masa arxasında yox, artıq döyüş meydanında müəyyənləşib”:
“Münaqişə Kiyevin müəyyən əraziləri itirməsi ilə başa çatacaq. Putin, əlbəttə ki, nəsə götürəcək — axı onlar döyüşüblər, o torpaqlarda müharibə aparıblar. Bu, onun qazandığı ərazidir.”
ABŞ prezidenti əlavə edib ki, o, müharibənin “mümkün ən tez zamanda” bitməsi üçün çalışır və məqsədi Ukraynaya sonsuz maliyyə axınını dayandırmaqdır. Tramp bəyan edib:
“Biz milyardlarla dollar xərcləyirik, amma nəticə yoxdur. Ukrayna ordusu tükənib, Rusiya isə irəliləyir. Əgər indi dayanmasaq, daha çox insan öləcək.”
Trampın bu açıqlaması, onun uzun müddətdir müdafiə etdiyi “sülh müqabilində ərazi güzəşti” mövqeyini bir daha təsdiqləyir.
Xatırladaq ki, bir neçə gün öncə The Washington Post nəşri Tramp və Putin arasında gizli telefon danışığının baş tutduğunu yazmışdı. Mənbələrə görə, həmin söhbət zamanı Putin “münaqişəyə son qoymaq üçün” Ukraynanın Donetsk vilayətinə tam nəzarətdən imtina etməsini tələb edib. Eyni zamanda Rusiya lideri Xerson və Zaporojye vilayətlərində “müəyyən güzəştlərin nəzəri imkanlarını” istisna etməyib.
Trampın son bəyanatı ABŞ Konqresində və Avropa paytaxtlarında tənqidlə qarşılanıb. Demokrat senatorlar onun bu açıqlamasını “Putinə güzəştin legitimləşdirilməsi” kimi qiymətləndiriblər. Avropa Parlamentinin bir sıra üzvləri isə Trampın sözlərini “Ukraynanın suverenliyinə təhdid” adlandırıblar.
Musavat.com qeyd edir ki, Tramp “müharibəni dayandırmaq” ifadəsi ilə əslində Ukraynanın ərazi bütövlüyü məsələsində güzəştə getməyə hazır olduğunu göstərir. Amma görünən budir ki, Ukraynanın özü buna hazır deyil.
Musavat.com
