İspaniyanın Palma de Mallorca və Almaniyanın Münhen hava limanlarında eyni gün dronların müşahidə olunması səbəbilə uçuşlar müvəqqəti olaraq dayandırılıb.
"Cebheinfo.az" xəbər verir ki, İspaniyanın Palma de Mallorca və Almaniyanın Münhen hava limanlarında hava məkanına icazəsiz daxil olan dronlar səbəbilə uçuşlar müvəqqəti olaraq dayandırılıb.
Palma de Mallorca Hava Limanı bazar günü axşam saatlarında hava məkanında dron görüldüyü barədə xəbərdarlıq alandan sonra bütün uçuşları dayandırıb. “FlightRadar24”-ün məlumatlarına əsasən, son eniş yerli vaxtla saat 18:58-də baş verib və onlarla uçuş digər şəhərlərə yönləndirilib. “Gatwick”-dən gələn bəzi təyyarələr eniş icazəsi ala bilmədiyi üçün minlərlə sərnişin terminalda gözləməli olub.
Təxminən bir saatlıq fasilədən sonra əməliyyatlar yenidən başlayıb. Eyni gün Almaniyanın Münhen Hava Limanı da “dron xəbərdarlığı” səbəbilə müvəqqəti olaraq bağlanıb. Federal polis şənbə gecəsi saat 22:00 və 23:00 arasında iki ayrı müşahidə hesabatı alındığını, lakin bölgədə hər hansı bir dronun tapılmadığını açıqlayıb. Təxminən yarım saat davam edən bağlanmadan sonra hava hərəkəti yenidən bərpa olunub.
Üç uçuş digər hava limanlarına yönləndirilib, bir uçuş isə ləğv edilib. Rəsmilər hadisənin sərnişinlərə təsirinin “məhdud” olduğunu bildiriblər. Digər tərəfdən, Almaniyada bu ayın əvvəlində də Münhen Hava Limanı 24 saat ərzində iki dəfə dron müşahidəsi səbəbilə bağlanmış və minlərlə sərnişin çətinliklərlə üzləşmişdi.
