“Kəpəz”ni baş məşqçisi Azər Bağırov Misli Premyer Liqasının 9-cu turunda “İmişli”yə məğlub olduqları oyunla (0:3) bağlı danışıb.
QOL.az xəbər verir ki, matçdan sonra mütəxəssis jurnalistlərin suallarını cavablandırarkən komandanın qırmızı vərəqə aldığı andan sonra oyun planının pozulduğunu bildirib: “Çox ağır məğlubiyyət aldıq. Qırmızı vərəqəyə qədər pis oynamırdıq, bəzi epizodlar alınırdı. Lakin qırmızıdan sonra bütün planlarımız pozuldu."
Bağırov ötən tur “Şamaxı”ya qarşı qazandıqları qələbəni təsadüfi saymır: “Futboldur, hər oyun fərqlidir. ‘Şamaxı’da rəqib qırmızı vərəqə alanda hesabda öndə idik. Bu gün isə ilk 25 dəqiqədə komanda pis oynamadı.”
Qapıçının çıxışı ilə bağlı suallara isə belə cavab verib: “Şərh etməyə ehtiyac yoxdur. Çox şey danışmaq olar, amma bu gün susmaq lazımdır. Qışa qədər mümkün qədər çox xal toplamalıyıq.”
“Qışda yeni qapıçı transferi gözlənilir?” sualına: “Hər şey ola bilər, düşünəcəyik,” deyə cavab verib.
Qapıçının seçiminin səbəblərini izah edərkən isə baş məşqçi bildirib ki, seçim məşqə yanaşma və intizam meyarlarına görə aparılıb: “Xüsusi bir səbəb yoxdur. Məşqə yanaşma, intizam qaydalarına görə seçim edirik. Qapıçı məşqçisi ilə də məsləhətləşirik.”
