1-ci Liqanın 6-cı turunda öz meydanında "Səbail"lə qarşılaşan "Şəfa" çempionluq mübarizəsindəki əsas rəqibi ilə 2:2 hesablı bərabərliyə razılaşaraq xal hesabını 16-ya çatdırdı və turnir cədvəlində şəriksiz lider mövqeyində qaldı. "Şəfa"da daha çox vinger qismində çıxış edən Emin Zamanovla əlaqə saxlayıb həm son matç barədə fikirlərini öyrəndik, həm də Azərbaycan Kubokunun 2-ci təsnifat mərhələsində sabah "Cəbrayıl"a qarşı keçirəcəkləri oyundan nə gözlədiyini soruşduq.
Onun Fanat.Az-a açıqlaması belə oldu:
"Düşünürəm ki, çox maraqlı və gərgin matç alındı. Hər iki komanda çempionluq uğrunda mübarizə aparır. Bəzi məqamlarda daha diqqətli olmalı idik. Xüsusilə də, standart vəziyyətlərdə... Məhz bu məqamlar qələbə qazanmağımıza mane oldu.
"Mingəçevir"lə çempionat matçından öncə sabah "Cəbrayıl"la çətin kubok oyunumuz var. Hazırda bütün diqqətimiz o oyundadır. Allahın izni ilə kubok matçını da uğurlu şəkildə başa vurduqdan sonra "Mingəçevir"lə səfər qarşılaşması barədə düşünəcəyik".
Zamanov "sizi Mingəçevirdə 1 xal qane edəcəkmi" sualını belə cavablandırdı:
"Bir onu dəqiq deyə bilərəm ki, bizi heç bir matçda 1 xal qane etmir. Bütün oyunlara yalnız və yalnız 3 xal üçün çıxırıq".
Nihat
