Hindistanın hakim Bharatiya Janata Partiyası (BJP) millət vəkili və keçmiş nazir Basanagouda R. Patil Yatnal ölkə üzrə halal sertifikası tətbiqinin qadağan olunması çağırışı ilə mübahisələrə səbəb olub.
"Cebheinfo.az" xəbər verir ki, Karnataka ştatının Vijayapura şəhərini təmsil edən BJP millət vəkili və keçmiş nazir Yatnal, daxili işlər naziri Amit Şaha göndərdiyi məktubda “halal sertifikatı verən bütün qurumların və halal işarəli məhsulların qadağan olunmasını” tələb edib. Yatnal halal sertifikatının “İslam şəriətinə əsaslanan” bir tətbiq olduğunu və Hindistan Konstitusiyasında hüquqi əsasının olmadığını iddia edib.
O, qida təhlükəsizliyi və standartlarına nəzarət edən yeganə hüquqi qurumun Hindistan Qida Təhlükəsizliyi və Standartları İdarəsi (FSSAI) olduğunu bildirərək, “FSSAI mövcud olduğu halda dini əsaslı başqa sertifikatlaşdırma qurumlarına nə ehtiyac var?” deyə sual edib.
Millət vəkili həmçinin “Halal India”, “Jamiat Ulamai-Hind Halal Trust” və bənzər qurumların topladığı vəsaitlərin “qanunsuz fəaliyyətlərin maliyyələşdirilməsində istifadə oluna biləcəyini” irəli sürüb. Bu iddialar ictimai sənədlərlə təsdiqlənməsə də, Yatnal halal sertifikatının iqtisadi baxımdan “müsəlman sahibkarlara üstünlük verdiyini, digər icmalara isə zərər vurduğunu” iddia edib.
Yatnal Uttar Pradeş ştatının yaxın vaxtlarda halal sertifikatı verən qurumları qadağan etdiyini xatırladaraq, bu tətbiqin milli səviyyədə də həyata keçirilməsini istəyib.Bu çağırış Hindistanda dini kimliyin ticarət və ictimai həyatdakı rolu ilə bağlı gərginliyi yenidən alovlandırıb.
