Litva hökuməti bu ölkədən hava balonlarından istifadə edərək qaçaqmalçılıq yolu ilə daşınan malların hava məkanını pozması səbəbindən Belarusla son iki açıq sərhəd keçidini bir ay müddətinə bağlamaq qərarına gəlib.
Busaat.az xəbər verir ki, Litva Milli Radio və Televiziyasının (LRT) məlumatına görə, hökumət Medininkay və Salcininkay sərhəd keçidlərinin noyabrın 30-na qədər bağlı qalması, lazım gələrsə, bağlanmanın potensial olaraq uzadılması barədə qərar qəbul edib.
Litvanın daxili işlər naziri Vladislav Kondratoviç hökumətin iclasında çıxış edərək, müəyyən şərtlər daxilində Medininkay sərhəd keçid məntəqəsində keçidlərə icazə verəcəklərini bəyan edib. O bildirib:
“Bu keçid yalnız diplomatlar, Rusiyanın Kalininqrad vilayətinə tranzit, Litvaya qayıdan vətəndaşlar, Avropa İttifaqı və NATO ölkələrinin vətəndaşları və onların ailə üzvləri, Litvada yaşamaq icazəsi olan şəxslər üçün açıq olacaq”.
Kondratoviç onu da bildirib ki, sərhəd xidməti tərəfindən verilən qərardan sonra humanitar vəziyyətlərdə Medininkay sərhəd keçid məntəqəsindən keçidlərə icazə veriləcək. O qeyd edib: “Bu dəyişikliklər, bu gün gördüyümüz kimi, problemin həlli üçün heç bir səy göstərməyən və xüsusilə də dostluq münasibəti göstərməyən qonşumuza aydın mesaj verməlidir. Onların passivliyi onların bu fəaliyyətdə faktiki şərikliyini nümayiş etdirir”.
Litva və Belarus arasındakı digər sərhəd keçid məntəqələri keçən il və 2023-cü ildə qəbul edilmiş qərarlara əsasən bağlanıb. Medininkay və Salcininkay iki ölkə arasında mövcud olan son iki keçid olub.
Belarusdan Litvaya və ya əksinə səyahət etmək istəyənlər indi Latviya və ya Polşadakı sərhəd keçid məntəqələrindən istifadə etməlidirlər.
Yeganə
