Saç baxımında ən çox edilən səhvlərdən biri saç kremini yanlış tətbiq etməkdir. Mütəxəssislərin fikrincə, çoxları əvvəlcə şampun, sonra krem istifadə etməklə saçlarının təbii nəmini itirir. Halbuki “CWC metodu” adlanan yeni üsul saçların daha sağlam və parlaq görünməsinə kömək edir.
CWC nədir?
Pravda.az bildirir ki, CWC (“Condition–Wash–Condition”) üsulu saçların qorunması üçün sadə, lakin effektiv addımlardan ibarətdir. Bu metodu tətbiq edərkən saçlar əvvəlcə krem, sonra şampun, daha sonra isə yenidən krem ilə yuyulur.
Addımlar belədir:
Saç tam isladılır və yalnız uclara, uzun hissələrə saç kremi çəkilir.
Ardınca saç şampunla yuyulur, xüsusilə saç diblərinə diqqət yetirilir.
Son mərhələdə yenidən krem tətbiq edilir və bir neçə dəqiqə gözlədikdən sonra soyuq su ilə durulanır.
Niyə bu üsul daha faydalıdır?
Mütəxəssislərin sözlərinə görə, şampun saçın təbii yağlarını təmizləyərək onun qurumasına səbəb olur. İlk mərhələdə istifadə edilən krem bu təsiri azaldır və saçın qoruyucu qatını saxlayır. İkinci krem tətbiqi isə nəmi bərpa edərək saçlara yumşaqlıq və parlaqlıq verir.
Qeyd: CWC metodu xüsusilə quru, zədələnmiş və boyalı saçlara sahib şəxslər üçün tövsiyə olunur. Bu üsul saçların həm daha sağlam görünməsini, həm də uzunmüddətli baxımını təmin edə bilər.
Əminə Bayramova
