Kəlbəcərin tanınmış ziyalısı Əli Kazımov vəfat edib.
Modern.az-ın məlumatına görə, o, bu gün dünyasını dəyişib.
Əli Kazımov uzun illər Kəlbəcər rayon təhsil şöbəsinə rəhbərlik edib, həmçinin Kəlbəcər məktəbində müəllim kimi çalışıb. Təhsil şöbəsinə rəhbərlik etdiyi illərdə Əli Kazımovun Kəlbəcər məktəblilərinin üzərində xüsusi əməyi olub.
Əli Kazımovun pedaqoji fəaliyyəti və idarəçilik təcrübəsi Kəlbəcər rayonunun təhsil sistemində dərin iz buraxıb. O, müəllimlik etdiyi illərdə savadlı, vətənpərvər və məsuliyyətli gənclərin yetişdirilməsinə xüsusi önəm verib. Onun rəhbərliyi dövründə Kəlbəcərin bir çox məktəbləri respublika miqyaslı olimpiadalarda, müsabiqə və imtahanlarda fərqlənib, rayonun təhsil göstəriciləri yüksəlib.
Kəlbəcər təhsilinin "atası" kimi tanınan Əli Kazımov rayonda "Qara Bəhmən" kimi tanınan Bəhmən Kərimovun yetirməsidir.
Əli Kazımovun vəfatı Kəlbəcərin təhsil ictimaiyyəti üçün böyük itkidir. Onun adı uzun illər rayonun maarif tarixində xidmət və fədakarlıq nümunəsi kimi yaşayacaq. Həmin illərdə Kəlbəcərdə təhsil alan şəxslər onun həm müəllimlik fəaliyyətini, həm də rayon təhsilinə verdiyi töhfələri xatırlayır.
